ബംഗളൂരു: തെരഞ്ഞെടുപ്പു കാലത്ത് നൽകിയ അഞ്ച് വാഗ്ദാനങ്ങളും നടപ്പിലാക്കാനൊരുങ്ങി കർണാടക സർക്കാർ. അഞ്ച് വാഗ്ദാനങ്ങളും ഈ സാമ്പത്തിക വർഷം തന്നെ ജാതി മത വ്യത്യാസമില്ലാതെ നടപ്പിലാക്കുമെന്ന് മുഖ്യമന്ത്രി സിദ്ധരാമയ്യ അറിയിച്ചു.

മുഖ്യമന്ത്രിയുടെ നേതൃത്വത്തിലുള്ള ക്യാബിനറ്റ് യോഗത്തിൽ വിശദമായ ചർച്ചകൾക്കു ശേഷമാണ് അഞ്ച് വാഗ്ദാനങ്ങൾക്കും അംഗീകാരം നൽകിയത്.

• എല്ലാ വീടുകളിലേക്കും 200 യൂണിറ്റ് സൗജന്യ വൈദ്യുതി(ഗൃഹ ജ്യോതി)

• എല്ലാ വീട്ടമ്മമാർക്കും 2,000 രൂപ വീതം മാസ വേതനം (ഗൃഹലക്ഷ്മി)

• ദാരിദ്ര്യ രേഖയ്ക്കു താഴെയുള്ള കുടുംബങ്ങളിലെ ഓരോ അംഗങ്ങൾക്കും 10 കിലോ വീതം സൗജന്യ അരി ( അന്ന ഭാഗ്യ)

• ബിരുദം നേടിയിട്ടും തൊഴിൽരഹിതരായി തുടരുന്ന യുവാക്കൾക്ക് 3000 രൂപയും ഡിപ്ലോമയോടു കൂടിയ തൊഴിൽ രഹിതർക്ക് 1500 രൂപയും മാസ വേതനം. (യുവനിധി) 18 മുതൽ 25 വയസു വരെയുള്ളവരെയാണ് ഈ പദ്ധതിയിൽ ഉൾക്കൊള്ളിക്കുക.

• സർക്കാർ ബസുകളിൽ വനിതകൾക്ക് സൗജന്യ യാത്ര(ശക്തി).

എന്നിവ‍യാണ് കോൺഗ്രസ് അധികാരത്തിലേറും മുൻപേ വാഗ്ദാനം നൽകിയിരുന്നത്.

ഇതിൽ ഗൃഹ ജ്യോതി പദ്ധതി ജൂലൈ 1 മുതൽ നടപ്പിലാക്കും. ഗൃഹലക്ഷ്മി പദ്ധതി ഓഗസ്റ്റ് 5 മുതലും, അന്ന ഭാഗ്യ പദ്ധതി ജൂലൈ 1 മുതലും നടപ്പിലാക്കും. സ്ത്രീകൾക്ക് എസി, ലക്ഷ്വറി ബസുകൾ ഒഴികെയുള്ള സർ‌ക്കാർ ബസുകളിൽ സൗജന്യ യാത്ര ഉറപ്പാക്കുന്ന ശക്തി പദ്ധതി ജൂൺ 1 മുതലും പ്രാബല്യത്തിൽ വരും.

ബസുകളിൽ 50 ശതമാനം പുരുഷന്മാർക്കു വേണ്ടി റിസർവ് ചെയ്യുമെന്നും മുഖ്യമന്ത്രി അറിയിച്ചു. ജൂൺ 15 മുതൽ ജൂലൈ 15 വരെ അപേക്ഷകൾ സമർപ്പിക്കാം.