ദോഹ: കോട്ടയം വൈക്കം സ്വദേശി ജോയ് മാത്യു ഖത്തറിലുണ്ടായ വാഹനാപകടത്തിൽ മരിച്ചു. ​ചൊവ്വാഴ്ച പുലർച്ചെ ദുഖാൻ ഹൈവേയിലാണ് അപകടമുണ്ടായത്. 47 വയസായിരുന്നു. മനോരമ ഓൺലൈൻ അസോസിയേറ്റ് പ്രൊഡ്യൂസറായ ശ്രീദേവി ജോയാണ് ഭാര്യ.

ശ്രീദേവി ദീർഘകാലം ഖത്തറിൽ മാധ്യമ പ്രവർത്തകയായിരുന്നു. 13 വർഷത്തോളമായി ഖത്തറിലുള്ള ജോയ് മാത്യു ഇവന്‍റ് മാനേജ്മെന്‍റ് മേഖലയിൽ ജോലി ചെയ്യുകയായിരുന്നു. ജോലി ആവശ്യാർഥം ഷാഹാനിയയിൽ പോയി തിരിച്ച് വരും വഴി പുലർച്ചെ മൂന്ന് മണിയോടെ ദുഖാൻ റോഡിൽ ട്രക്കിനു പിറകിൽ കാറിടിച്ചായിരുന്നു അപകടം.

വൈക്കം ചെമ്മനത്തുകര ഒഴവൂർ വീട്ടിൽ പരേതനായ മാത്യുവിന്‍റെ മകനാണ്. മാതാവ് തങ്കമ്മ.

ഇൻഡസ്ട്രിയൽ ഏരിയ ഹമദ് മെഡിക്കൽ കോർപറേഷൻ (ഹസം മിബൈരിക് ജനറൽ) ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം ഖത്തർ കെഎംസിസി അൽ ഇഹ്സാൻ സമിതിയുടെ നേതൃത്വത്തിൽ നടപടികൾ പൂർത്തിയാക്കിയ ശേഷം നാട്ടിലെത്തിക്കും.