ദുബായ്: ദുബായ് എമിറേറ്റ്സ് റോഡിൽ (E611) മിനിബസും ട്രക്കും കൂട്ടിയിടിച്ച് 8 പേർ മരിക്കുകയും 9 പേർക്ക് പരുക്കേൽക്കുകയും ചെയ്തു. മരിച്ചവരിൽ 6 പേരും ഇന്ത്യക്കാരാണെന്നാണ് വിവരം.

സാങ്കേതിക തകരാറിനെ തുടർന്ന് ഒരു ട്രക്ക് പെട്ടെന്ന് റോഡിന് നടുവിൽ നിർത്തിയതാണ് അപകടത്തിന് കാരണമായതെന്ന് ദുബായ് പൊലീസ് അറിയിച്ചു. തൊട്ടുപിന്നാലെ വന്ന മിനിബസ് ട്രക്കിന്‍റെ പിൻഭാഗത്തേക്ക് ഇടിച്ചുകയറുകയായിരുന്നു.

8 പേരും സംഭവസ്ഥലത്തുതന്നെ മരിച്ചു. പരുക്കേറ്റ 5 പേരുടെ പരുക്ക് ഗുരുതരമാണ്, 4 പേർക്ക് നിസാര പരുക്കുകളുണ്ട്. പരുക്കേറ്റവരെ ഉടൻ തന്നെ ആശുപത്രിയിലേക്ക് മാറ്റി. ദുബായ് പൊലീസ് ട്രാഫിക് വിഭാഗം സ്ഥലത്തെത്തി രക്ഷാപ്രവർത്തനം നടത്തുകയും ഗതാഗതം പുനഃസ്ഥാപിക്കുന്നതിനായി അപകടത്തിൽപ്പെട്ട വാഹനങ്ങൾ റോഡിൽ നിന്ന് മാറ്റുകയും ചെയ്തു.