ജയ്പുർ: ലഖ്നൗ സൂപ്പർ ജയന്‍റ്സിനെതിരായ ഐപിഎൽ മത്സരത്തിൽ രാജസ്ഥാൻ റോയൽസ് ക്യാപ്റ്റൻ സഞ്ജു സാംസൺ കളിക്കില്ല. കഴിഞ്ഞ മത്സരത്തിൽ പരുക്കേറ്റ് റിട്ടയഡ് ഹർട്ടായ സഞ്ജു പിന്നീട് ബാറ്റിങ്ങിന് ഇറങ്ങിയിരുന്നില്ല. സ്കാൻ റിപ്പോർട്ട് പ്രകാരം വാരിയെല്ലിനു പരുക്കേറ്റിട്ടുണ്ട്.

സഞ്ജുവിനു പകരം റിയാൻ പരാഗാണ് ലഖ്നൗവിനെതിരേ രാജസ്ഥാനെ നയിക്കുന്നത്. ടോസ് നേടിയ ലഖ്നൗ ക്യാപ്റ്റൻ ഋഷഭ് പന്ത് ബാറ്റിങ് തെരഞ്ഞെടുത്തു. ഇതിനു പിന്നാലെ, സഞ്ജുവിനു പകരം വൈഭവ് സൂര്യവംശി കളിക്കാനിറങ്ങുമെന്ന് റിയാൻ പരാഗ് പ്രഖ്യാപിച്ചു.

14 വർഷവും 23 ദിവസവും മാത്രമാണ് സൂര്യവംശിയുടെ ഇപ്പോഴത്തെ പ്രായം. ഇംപാക്റ്റ് സബ്സ്റ്റിറ്റ്യൂട്ടായാണ് ഈ ബിഹാറുകാരനെ ടീമിൽ ഉൾപ്പെടുത്തിയിരിക്കുന്നത്. ഐപിഎല്ലിന്‍റെ ചരിത്രത്തിലെ തന്നെ ഏറ്റവും പ്രായം കുറഞ്ഞ ക്രിക്കറ്റായി മാറുകയാണ് വൈഭവ്.