ലക്ഷദ്വീപിനും ലഡാക്കിലും മദ്യ നിരോധനം പിൻവലിച്ചതിൽ പ്രതിഷേധം

കാവരത്തി/ലേ: അഞ്ച് പതിറ്റാണ്ടോളമായി നിലനിന്നിരുന്ന കടുത്ത മദ്യനിരോധന നിയമങ്ങൾ കാറ്റിൽപ്പറത്തി ലക്ഷദ്വീപിൽ നിയന്ത്രിത മദ്യവിൽപ്പനയ്ക്ക് അനുമതി നൽകി കേന്ദ്ര സർക്കാർ ഉത്തരവിറക്കി. 1979-ലെ ലക്ഷദ്വീപ് മദ്യനിരോധന ചട്ടം പൂർണമായും റദ്ദാക്കിക്കൊണ്ടാണ് പുതിയ ഗസറ്റ് വിജ്ഞാപനം പുറപ്പെടുവിച്ചിരിക്കുന്നത്. പകരം 'ലക്ഷദ്വീപ് എക്സൈസ് റഗുലേഷൻ 2026' പ്രാബല്യത്തിൽ വന്നു.

ഇതോടെ ലക്ഷദ്വീപിൽ മദ്യത്തിന്‍റെ ഉത്പാദനം, ഇറക്കുമതി, കയറ്റുമതി, ഗതാഗതം, കൈവശം വയ്ക്കൽ, വാങ്ങൽ, വിൽപ്പന, ഉപഭോഗം എന്നിവയ്ക്കായി ലൈസൻസ് അനുവദിക്കുന്നതിനുള്ള പുതിയ സംവിധാനം നിലവിൽ വരും. ചരിത്രത്തിലാദ്യമായി സർക്കാർ ഉടമസ്ഥതയിലുള്ള കോർപ്പറേഷനുകൾക്കും ഏജൻസികൾക്കും ദ്വീപിൽ മദ്യം ഇറക്കുമതി ചെയ്യാനും റീട്ടെയിൽ വിൽപ്പന നടത്താനുമുള്ള ലൈസൻസുകൾ ഇനി ലഭ്യമാകും.

നീക്കത്തിനെതിരേ ലക്ഷദ്വീപിലും മറ്റൊരു കേന്ദ്രഭരണ പ്രദേശമായ ലഡാക്കിലും വൻ ജനകീയ പ്രതിഷേധമാണ് ഉയരുന്നത്. ലക്ഷദ്വീപിനൊപ്പം ലഡാക്കിലും കടുത്ത മദ്യനിയന്ത്രണങ്ങൾ നീക്കി മദ്യ വിൽപ്പന വൻതോതിൽ ഉദാരമാക്കാൻ കേന്ദ്ര സർക്കാർ തീരുമാനിച്ചതാണ് ഇരു മേഖലകളിലും സാമൂഹിക, രാഷ്ട്രീയ, മത സംഘടനകളെ തെരുവിൽ പ്രതിഷേധിക്കാൻ പ്രേരിപ്പിച്ചത്.

നികുതി ചുമത്തി നിയന്ത്രിക്കാൻ ശ്രമം

ലക്ഷദ്വീപിൽ മദ്യവിൽപ്പന അനുവദിച്ചെങ്കിലും കടുത്ത നിയന്ത്രണങ്ങൾ തുടരുമെന്നാണ് അഡ്മിനിസ്ട്രേഷൻ വ്യക്തമാക്കുന്നത്. വിപണിയിൽ മദ്യം അനിയന്ത്രിതമായി ഒഴുകാൻ അനുവദിക്കില്ലെന്നും, ആവശ്യമെങ്കിൽ ദ്വീപിന്‍റെ ഏതെങ്കിലും ഭാഗത്തും വീണ്ടും മദ്യനിരോധനം ഏർപ്പെടുത്താൻ അഡ്മിനിസ്ട്രേറ്റർക്ക് പൂർണ അധികാരമുണ്ടായിരിക്കുമെന്നും അധികൃതർ അറിയിച്ചു. 21 വയസിനു താഴെയുള്ളവർക്ക് മദ്യം വിൽക്കുന്നത് കർശനമായി നിരോധിച്ചിട്ടുണ്ട്.

ഇതിനുപുറമെ, മദ്യത്തിന് വൻതോതിലുള്ള നികുതിയാണ് ലക്ഷദ്വീപ് ഭരണകൂടം ചുമത്തിയിരിക്കുന്നത്. ഇന്ത്യൻ നിർമിത വിദേശ മദ്യത്തിനും (IMFL) ഇറക്കുമതി ചെയ്യുന്ന വിദേശ മദ്യത്തിനും 400 ശതമാനമാണ് എക്സൈസ് ഡ്യൂട്ടി നിശ്ചയിച്ചിരിക്കുന്നത്. ബിയറിന് 200 ശതമാനവും വൈനിന് 80 ശതമാനവും നികുതി ചുമത്തിയിട്ടുണ്ട്. ഡൽഹിയിൽ ഇത്തരം മദ്യങ്ങൾക്ക് 25 ശതമാനം വാറ്റ് മാത്രമാണ് ഈടാക്കുന്നത്.

ലക്ഷദ്വീപിലെ ആകെ 36 ദ്വീപുകളിൽ ജനവാസമുള്ള അഗത്തി, അമിനി, ആന്ത്രോത്ത്, ബിത്ര, ചെത്ലാത്, കട്മത്, കൽപ്പേനി, കവരത്തി, കിൽത്താൻ, മിനിക്കോയ് എന്നീ 10 ദ്വീപുകളിലും ഈ നിയമം ബാധകമാകും. നിലവിൽ ഇന്ത്യൻ വിനോദസഞ്ചാരികൾക്കും വിദേശികൾക്കും പ്രത്യേക പെർമിറ്റിലൂടെ മാത്രമാണ് ദ്വീപിലേക്ക് പ്രവേശനമുള്ളത്.

ലക്ഷദ്വീപിലെ മദ്യ നിരോധനത്തിന്‍റെ ചരിത്രം

ലക്ഷദ്വീപിലെ സാമൂഹികവും സാംസ്കാരികവുമായ പശ്ചാത്തലം മുൻനിർത്തിയാണ് 1979-ൽ അവിടെ മദ്യനിരോധനം ഏർപ്പെടുത്തിയത്. ഇവിടുത്തെ ജനസംഖ്യയിൽ 97 ശതമാനവും മുസ്ലിം വിഭാഗത്തിൽപ്പെട്ടവരാണ്. ഇന്ത്യയിൽ ഏറ്റവും കൂടുതൽ മുസ്ലിം ജനസംഖ്യയുള്ള കേന്ദ്രഭരണ പ്രദേശമാണിത്. 2011-ലെ സെൻസസ് പ്രകാരം ഇവിടുത്തെ 64,473 നിവാസികളിൽ 61,120 പേരും (ഏതാണ്ട് 95 ശതമാനം) പട്ടികവർഗ (ST) വിഭാഗത്തിൽപ്പെടുന്നവരാണ്.

ഇസ്ലാമിൽ മദ്യപാനം നിഷിദ്ധമായതിനാലും, തദ്ദേശീയമായ പാരമ്പര്യങ്ങളെയും താത്പര്യങ്ങളെയും മാനിച്ചും തുടർന്നു വന്ന ഭരണകൂടങ്ങളെല്ലാം മദ്യനിരോധനം നിലനിർത്തുകയായിരുന്നു. ഗുജറാത്ത്, ബിഹാർ, ചില വടക്കുകിഴക്കൻ സംസ്ഥാനങ്ങൾ എന്നിവയ്ക്കൊപ്പം ഇന്ത്യയിൽ മദ്യനിരോധനമുള്ള അപൂർവം പ്രദേശങ്ങളിലൊന്നായിരുന്നു ലക്ഷദ്വീപ്.

എന്നാൽ, ഈ നിരോധനം പൂർണമായിരുന്നില്ല. ബംഗാരം, കവരത്തി ദ്വീപുകളിലെ ചില പ്രത്യേക ടൂറിസ്റ്റ് റിസോർട്ടുകളിലും സർക്കാർ സ്ഥാപനങ്ങളിലും വിനോദസഞ്ചാരികൾക്കായി മദ്യം വിളമ്പാൻ പരിമിതമായ ഇളവുകൾ അനുവദിച്ചിരുന്നു.

2020-ൽ അഡ്മിനിസ്ട്രേറ്ററായി പ്രഫുൽ ഖോദ പട്ടേൽ ചുമതലയേറ്റ ശേഷമാണ് മദ്യനിരോധനം ലഘൂകരിക്കാനുള്ള നീക്കങ്ങൾക്ക് വേഗത കൂടിയത്. 2021-ൽ ജനവാസമുള്ള ദ്വീപുകളിലെ ടൂറിസം കേന്ദ്രങ്ങളിലേക്ക് മദ്യവിൽപ്പന വ്യാപിപ്പിക്കാൻ നിർദേശമുണ്ടായപ്പോൾ പ്രാദേശിക പാർട്ടികളും ജനങ്ങളും കടുത്ത പ്രതിഷേധം ഉയർത്തിയിരുന്നു. തുടർന്ന് 2023-ൽ എക്സൈസ് ചട്ടത്തിന്‍റെ കരട് പ്രസിദ്ധീകരിക്കുകയും, ഈ വർഷം ഫെബ്രുവരിയിൽ ചെത്ലാത്, ബിത്ര ദ്വീപുകളിലെ എട്ട് സർക്കാർ ഗസ്റ്റ് ഹൗസുകളിൽ പെർമിറ്റുള്ളവർക്ക് മദ്യം വിളമ്പാൻ അനുമതി നൽകുകയും ചെയ്തു.

ജമ്മു കശ്മീർ പോലുള്ള മുസ്ലിം ഭൂരിപക്ഷ പ്രദേശങ്ങളിലും മാലിദ്വീപ് പോലുള്ള രാജ്യങ്ങളിലും നിർദിഷ്ട മേഖലകളിൽ മദ്യം ലഭ്യമാണെന്ന വാദമുയർത്തിയാണ് കേന്ദ്രം ഇപ്പോൾ നിരോധനം പൂർണമായി നീക്കിയത്.

മാലിദ്വീപിനെ വെട്ടാൻ ലക്ഷദ്വീപ് ടൂറിസം

ലക്ഷദ്വീപിനെ ഒരു ആഗോള ടൂറിസം കേന്ദ്രമാക്കി മാറ്റാനുള്ള കേന്ദ്ര സർക്കാരിന്‍റെ ഊർജിത ശ്രമങ്ങളാണ് ഈ നയം മാറ്റത്തിനു പ്രധാന കാരണം. കടുത്ത മദ്യനിരോധനം കാരണം ഇന്ത്യൻ മഹാസമുദ്രത്തിലെ മറ്റ് വിനോദസഞ്ചാര കേന്ദ്രങ്ങളായ മാലിദ്വീപ് പോലുള്ളവയോട് മത്സരിക്കാൻ ലക്ഷദ്വീപിന് സാധിക്കുന്നില്ലെന്ന് ഉദ്യോഗസ്ഥർ ദീർഘകാലമായി വാദിക്കുന്നുണ്ടായിരുന്നു.

2024 ജനുവരിയിൽ പ്രധാനമന്ത്രി നരേന്ദ്ര മോദി ലക്ഷദ്വീപ് സന്ദർശിക്കുകയും ഇവിടുത്തെ മനോഹരമായ തീരങ്ങളുടെയും സ്നോർക്കലിങ്ങിന്‍റെയും ചിത്രങ്ങൾ പങ്കുവെക്കുകയും ചെയ്തതോടെയാണ് ലക്ഷദ്വീപ് ടൂറിസത്തിന് ജനപ്രീതി വർധിച്ചത്. വിദേശ ദ്വീപുകൾക്ക് പകരമായി ആഭ്യന്തര വിനോദസഞ്ചാരികൾ ലക്ഷദ്വീപിലേക്ക് ഒഴുകാൻ ഇത് കാരണമായി. സർക്കാർ കണക്കുകൾ പ്രകാരം 2020-ൽ വെറും 3,875 ആയിരുന്ന വിനോദസഞ്ചാരികളുടെ എണ്ണം 2024 ആയപ്പോഴേക്കും 68,328 ആയി കുതിച്ചുയർന്നു. ഈ വിനോദസഞ്ചാര വികസനത്തിന് കടുത്ത മദ്യനിരോധനം തടസമാണെന്ന നിഗമനത്തിലാണ് കേന്ദ്രം നിയമം റദ്ദാക്കിയത്.

പ്രതിഷേധവുമായി പ്രതിപക്ഷം; ലഡാക്കിലും അതൃപ്തി

കേന്ദ്രത്തിന്‍റെ ഏകപക്ഷീയമായ തീരുമാനത്തിനെതിരേ ലക്ഷദ്വീപിലും ലഡാക്കിലും വൻ പ്രതിഷേധമാണ് ഉയരുന്നത്. പ്രാദേശിക ജനവിഭാഗങ്ങളുടെ അനുമതിയില്ലാതെയാണ് ഈ നിയമങ്ങൾ അടിച്ചേൽപ്പിക്കുന്നതെന്ന് ആരോപണം. ലക്ഷദ്വീപ് എംപി മുഹമ്മദ് ഹംദുള്ള സയീദ് ഈ നീക്കത്തെ ശക്തമായി എതിർത്തു. ജനങ്ങളുമായി യാതൊരു ആലോചനയും നടത്താതെയാണ് മദ്യവിൽപ്പന വ്യാപിപ്പിക്കുന്നതെന്നും ഇത് യുവാക്കൾക്കിടയിൽ ലഹരി ഉപയോഗം കൂട്ടുമെന്നും സാമൂഹിക അന്തരീക്ഷം തകർക്കുമെന്നും അദ്ദേഹം മുന്നറിയിപ്പ് നൽകി. ഉത്തരവ് പിൻവലിക്കണമെന്ന് അദ്ദേഹം ആവശ്യപ്പെട്ടു.

അതേസമയം, മേയ് 30-ന് ലെഫ്റ്റനന്‍റ് ഗവർണർ വി.കെ. സക്സേന പുതിയ എക്സൈസ് നയം അംഗീകരിച്ചതോടെ ലഡാക്കിലും സ്ഥിതിഗതികൾ ശാന്തമല്ല. മുൻപ് ബിയറും വൈനും മാത്രം വിറ്റിരുന്ന ലഡാക്കിൽ ഇനി മുതൽ ഇന്ത്യൻ നിർമിത വിദേശ മദ്യവും കടുത്ത വിദേശ മദ്യങ്ങളും വിൽക്കാൻ അനുമതി നൽകി. കൂടാതെ ഹോംസ്റ്റേകളിലും ഗസ്റ്റ് ഹൗസുകളിലും മദ്യവിൽപ്പന അനുവദിക്കുകയും, ആകെ ഉണ്ടായിരുന്ന രണ്ട് മദ്യവിൽപ്പനശാലകളുടെ എണ്ണം 20 ആയി ഉയർത്തുകയും ചെയ്തു. ഹോട്ടൽ മുറികളിലും ഇനി മദ്യപിക്കാം. വ്യാജമദ്യ വിൽപ്പന തടയാനും ടൂറിസത്തെ പിന്തുണയ്ക്കാനുമാണ് ഈ നീക്കമെന്ന് ലഡാക്ക് അഡ്മിനിസ്ട്രേഷൻ വ്യക്തമാക്കുന്നു.

എന്നാൽ, ലഡാക്ക് ബുദ്ധിസ്റ്റ് അസോസിയേഷനും (LBA) കാർഗിലിലെ ജാമിയത്ത് ഉൽ ഉലമ ഇസ്നാ അഷാരിയയും ഈ തീരുമാനത്തിനെതിരേ രംഗത്തുവന്നിട്ടുണ്ട്. ലഡാക്കിനെ മറ്റൊരു ഗോവയോ ഡൽഹിയോ ആക്കി മാറ്റാൻ അനുവദിക്കില്ലെന്ന് ബുദ്ധിസ്റ്റ് അസോസിയേഷൻ യുവജന വിഭാഗം നേതാവ് ജിഗ്മെത് റഫ്സ്താൻ പറഞ്ഞു.

പുതിയ മദ്യനയം മേഖലയുടെ സാംസ്കാരിക മൂല്യങ്ങളെ തകർക്കുമെന്നും യുവാക്കളുടെ ഭാവി ഇല്ലാതാക്കുമെന്നും ജാമിയത്ത് ജനറൽ സെക്രട്ടറി ഷെയ്ഖ് ഇബ്രാഹിം ഖലീലിയും രാഷ്ട്രീയ നേതാവ് സജ്ജാദ് കാർഗിലും വ്യക്തമാക്കി. കാർഗിലിൽ പരസ്യമായി മദ്യവിൽപ്പന നടത്തിയാൽ ശക്തമായ ജനാധിപത്യ രീതിയിലുള്ള പ്രതിഷേധങ്ങൾ ആരംഭിക്കുമെന്നും അവർ മുന്നറിയിപ്പ് നൽകി.

സാമ്പത്തിക വളർച്ചയും ടൂറിസവും പ്രോത്സാഹിപ്പിക്കുമ്പോൾ പ്രാദേശികമായ സാംസ്കാരിക തനിമയും ജനങ്ങളുടെ ആരോഗ്യവും എങ്ങനെ സംരക്ഷിക്കുമെന്ന വലിയ ചർച്ചകൾക്കാണ് ഇരു കേന്ദ്രഭരണ പ്രദേശങ്ങളും ഇപ്പോൾ വേദിയാകുന്നത്.