ദുബായ്: മിഡില് ഈസ്റ്റിലെ ഏറ്റവും സ്വാധീനമുള്ള ഇന്ത്യക്കാരുടെ പട്ടിക പ്രസിദ്ധീകരിച്ചു. ദുബായിലെ പ്രമുഖ വാണിജ്യ മാഗസിനായ അറേബ്യന് ബിസിനസാണ് ഇത് സംബന്ധിച്ച പട്ടിക പുറത്തിറക്കിയത്.
ലുലു ഗ്രൂപ്പ് ചെയര്മാനും അബുദാബി ചേംബര് വൈസ് ചെയര്മാനുമായ എം.എ. യൂസഫലിയാണ് പട്ടികയില് ഒന്നാമതെത്തിയത്. ചോയിത്ത് റാം ഗ്രൂപ്പ് ചെയര്മാന് എല്.ടി. പഗറാണിയാണ് യൂസഫലിക്ക് പിന്നില്. ദുബായ് ഇസ്ലാമിക് ബാങ്ക് ചീഫ് എക്സിക്യൂട്ടിവ് ഓഫിസർ അഡ്നന് ചില്വാനാണ് പട്ടികയില് മൂന്നാമത്. ലുലു ഫിനാന്ഷ്യല് ഹോള്ഡിങ്സ് മാനെജിങ് ഡയറക്റ്റര് അദീബ് അഹമ്മദ്, സ്റ്റാന്ഡേർഡ് ചാര്ട്ടേഡ് ബാങ്ക് സിഇഒ സുനില് കൗശല് എന്നിവര് നാലും അഞ്ചും സ്ഥാനത്തായി പട്ടികയില് ഇടം പിടിച്ചു. ഗസാന് അബൂദ് ഗ്രൂപ്പ് സിഇഒ സുരേഷ് വൈദ്യനാഥന്, ബുര്ജില് ഹോള്ഡിങ്സ് ചെയര്മാന് ഡോ. ഷംസീര് വയലില്, ഇമാമി ഗ്രൂപ്പ് ഡയറക്റ്റര് പ്രശാന്ത് ഗോയങ്ക എന്നിവരും റാങ്ക് പട്ടികയില് ആദ്യ പത്തില് ഉള്പ്പെടുന്നു.
ഗള്ഫിലെ വാണിജ്യ വ്യവസായ രംഗത്ത് നിർണായക സ്വാധീനമുള്ള അബുദാബി ചേംബറിന്റെ വൈസ് ചെയര്മാനായും യൂസഫലി പ്രവര്ത്തിക്കുന്നുണ്ട്. ഇതാദ്യമായാണ് ഏഷ്യന് വംശജനായ ഒരു വ്യക്തിയെ ഒരു സര്ക്കാര് സ്ഥാപനത്തിന്റെ ഉന്നത പദവിയില് യുഎഇ പ്രസിഡന്റും അബുദാബി ഭരണാധികാരിയുമായ ശൈഖ് മുഹമ്മദ് ബിന് സായിദ് അല് നഹ്യാന് നിയമിച്ചത്. യുഎഇയുടെ വാണിജ്യ ജീവകാരുണ്യ മേഖലയില് നല്കിയ സംഭാവനകളെ മാനിച്ച് ഉന്നത സിവിലിയന് ബഹുമതിയായ അബുദാബി അവാര്ഡും യൂസഫലിക്ക് ലഭിച്ചിട്ടുണ്ട്.
ഗള്ഫ് രാജ്യങ്ങള്, ഈജിപ്ത്, ഇന്തോനേഷ്യ, മലേഷ്യ എന്നിവിടങ്ങളിലായി 247 ഹൈപ്പര്മാര്ക്കറ്റുകളുള്ള ലുലു ഗ്രൂപ്പില് 43 രാജ്യങ്ങളില് നിന്നുള്ള 65,000ത്തിലധികം ആളുകളാണുള്ളത്. യുഎസ്എ, യുകെ, സ്പെയിന്, ഇറ്റലി, ദക്ഷിണാഫ്രിക്ക, ശ്രീലങ്ക, ഫിലിപ്പൈന്സ്, തായ്ലാന്ഡ് എന്നിങ്ങനെ 23 രാജ്യങ്ങളിലായി ലോജിസ്റ്റിക്സ് കേന്ദ്രങ്ങളും ഗ്രൂപ്പിനുണ്ട്.