തിരുവനന്തപുരം: മില്മ ഉത്പന്നങ്ങളുടെ ഡിസൈനും അളവും വിലയും ഏകീകരിക്കുന്ന "റീപൊസിഷനിങ് മില്മ 2023' പദ്ധതിയുടെ ഉദ്ഘാടനം നാളെ മുഖ്യമന്ത്രി പിണറായി വിജയന് നിര്വഹിക്കും.
മില്മ ഉത്പന്നങ്ങളെ ബഹുരാഷ്ട്ര ബ്രാന്ഡുകളോട് കിടപിടിക്കത്തക്ക രീതിയില് പാക്കിങ്, ഡിസൈൻ, ഗുണനിലവാരം, വിപണനം എന്നിവയില് സമഗ്രമായ മാറ്റം വരുത്തി സംസ്ഥാനമൊട്ടാകെ ഏകീകരിച്ച് വിപണിയില് അവതരിപ്പിക്കുന്ന പദ്ധതിയാണിത്. ഇന്ന് വൈകിട്ട് 4.30ന് തിരുവനന്തപുരം ഇടപ്പഴഞ്ഞി ആര്ഡിആര് ഓഡിറ്റോറിയത്തില് നടക്കുന്ന ചടങ്ങില് ഏകീകൃത പാക്കിങ് ഡിസൈനിലുള്ള പാല്, തൈര്, നെയ്യ്, ഫ്ളവേഡ് മില്ക്ക് തുടങ്ങിയവ മുഖ്യമന്ത്രി വിപണിയിലിറക്കും. ചടങ്ങില് മന്ത്രി ജെ. ചിഞ്ചുറാണി അധ്യക്ഷയാകും.
മില്മയും മേഖല യൂണിയനുകളും വിപണിയിലെത്തിക്കുന്ന വിവിധ ഇനം പാല്, തൈര്, സെറ്റ് കര്ഡ്, ഫ്ളേവേര്ഡ് മില്ക്ക്, നെയ്യ് എന്നീ ഉത്പന്നങ്ങളുടെ ഗുണനിലവാരത്തിലും ഉത്പാദന പ്രക്രിയയിലും ഏകീകരണം വരുത്തുകയും സംസ്ഥാനമൊട്ടാകെ ഏകീകൃത ഡിസൈനിലുള്ള ഉത്പന്നങ്ങള് അവതരിപ്പിക്കുകയും ചെയ്യുകയാണ് പദ്ധതി ലക്ഷ്യമിടുന്നതെന്ന് മില്മ ചെയര്മാന് കെ.എസ്. മണി വാര്ത്താസമ്മേളനത്തില് പറഞ്ഞു. നിലവില് മലബാര്, എറണാകുളം, തിരുവനന്തപുരം മേഖല യൂണിയനുകള് പുറത്തിറക്കുന്ന പാല് ഒഴിച്ചുള്ള ഉത്പന്നങ്ങള് ഒരു പോലെ അല്ല. ഇതുമാറ്റി ഒരേ ഡിസൈനിലും രുചിയിലും അളവിലും അവതരിപ്പിക്കും. വിലയും ഏകീകരിക്കും. ഇതിനുള്ള പ്രവര്ത്തനം ഒരു വര്ഷം മുമ്പാണ് മില്മ ആരംഭിച്ചത്. സംസ്ഥാനത്തിന്റെ ഉള്പ്രദേശങ്ങളില് പോലും മില്മയുടെ എല്ലാ ഉത്പന്നങ്ങളും ലഭ്യമാക്കുന്ന രീതിയില് വിപണന ശൃംഖല വികസിപ്പിക്കാനും ഈ പദ്ധതിയിലൂടെ ലക്ഷ്യമിടുന്നുണ്ടെന്നും അദ്ദേഹം വ്യക്തമാക്കി.
ദേശീയ ക്ഷീര വികസന ബോര്ഡിന്റെ സാമ്പത്തിക സഹായവും സാങ്കേതിക പരിജ്ഞാനവും പ്രയോജനപ്പെടുത്തിയാണ് റീപൊസിഷനിങ് മില്മ 2023 പദ്ധതി നടപ്പാക്കുന്നത്. അന്താരാഷ്ട്ര കമ്പനികളോട് മത്സരിച്ച് വിപണി നിലനിര്ത്താനും വിപുലപ്പെടുത്താനുമായി മില്മയെ പ്രാപ്തമാക്കുകയാണ് ലക്ഷ്യം. പാലുത്പാദനവും വിപണനവും മെച്ചപ്പെടുത്താനും വിപണി സാധ്യത പ്രയോജനപ്പെടുത്താനും പദ്ധതി ലക്ഷ്യമിടുന്നു.
ഉദ്ഘാടന ചടങ്ങില് പ്രതിപക്ഷ നേതാവ് വി.ഡി. സതീശന് മുഖ്യപ്രഭാഷണം നടത്തും. മന്ത്രി ആന്റണി രാജു, ശശി തരൂര് എംപി, മേയര് ആര്യ രാജേന്ദ്രന്, ദേശീയ ക്ഷീരവികസന ബോര്ഡ് ചെയര്മാന് മീനേഷ് സി. ഷാ, ദേശീയ ക്ഷീരവികസന ബോര്ഡ് മുന് ചെയര്മാന് ടി. നന്ദകുമാര് എന്നിവര് മുഖ്യാതിഥികളാകും. മൃഗസംരക്ഷണ ക്ഷീരവികസന വകുപ്പ് സെക്രട്ടറി പ്രണബ്ജ്യോതി നാഥ്, മൃഗസംരക്ഷണ ക്ഷീരവികസന വകുപ്പ് ഡയറക്റ്റര് കൗശിഗന്, മില്മ എറണാകുളം മേഖല യൂണിയന് ചെയര്മാന് എം.ടി. ജയന്, കൗണ്സിലര് ഷീജ മധു, മില്മ ചെയര്മാന് കെ.എസ്. മണി, തിരുവനന്തപുരം മേഖല യൂണിയന് അഡ്മിനിസ്ട്രേറ്റീവ് കമ്മിറ്റി കണ്വീനര് എന്. ഭാസുരാംഗന് എന്നിവർ പങ്കെടുക്കും. മില്മ മാനെജിങ് ഡയറക്റ്റര് ആസിഫ് കെ. യൂസഫ് റിപ്പോര്ട്ട് അവതരിപ്പിക്കും. വാർത്താസമ്മേളനത്തിൽ എം.ടി. ജയന്, എന്. ഭാസുരാംഗന്, ആസിഫ് കെ. യൂസഫ് എന്നിവർ പങ്കെടുത്തു.