നടൻ നിവിൻ പോളിയും സംവിധായകൻ അൽഫോൺസ് പുത്രനും വീണ്ടും ഒന്നിക്കുന്നു. 11 വർഷങ്ങൾക്ക് ശേഷമാണ് ഇരുവരും ഒന്നിച്ചുള്ള ചിത്രം അനൗൺസ് ചെയ്തിരിക്കുന്നത്. നിവിൻ പോളിയുടെ 50ാം ചിത്രം കൂടിയായിരിക്കും ഇതെന്ന പ്രത‍്യേകത കൂടിയുണ്ട്. വരുന്ന 27ാം തീയതി ചിത്രത്തിന്‍റെ ടൈറ്റിൽ ലോഞ്ച് എറണാകുളം പത്മ തിയെറ്ററിൽ വച്ച് നടക്കും.

മലയാളത്തിലെ ഏക്കാലത്തെയും ട്രെൻഡ് സെറ്റർ ചിത്രമായ പ്രേമം ഒരുക്കിയ ടീം വീണ്ടും ഒന്നിക്കുമ്പോൾ പ്രതീക്ഷകൾ വാനോളമാണ്. നിവിൻ പോളിയെ മുഖ‍്യ കഥാപാത്രമാക്കി അൽഫോൺസ് പുത്രൻ സംവിധാനം ചെയ്ത രണ്ടു ചിത്രങ്ങളും ഹിറ്റായിരുന്നു.

പ്രേമത്തിന് ശേഷം പ്രിഥ്വിരാജ് സുകുമാരനെ നായകനാക്കി ഗോൾഡ് എന്ന ചിത്രം പുറത്തിറക്കിയെങ്കിലും ജനപ്രീതി നേടാൻ കഴിഞ്ഞിരുന്നില്ല. പ്രേമം തിയെറ്ററിലെത്തി 7 വർഷത്തെ ഇടവേളയ്ക്കു ശേഷം അൽഫോൺസ് സംവിധാനം ചെയ്ത ചിത്രമായിരുന്നു ഗോൾഡ്. മോട്ടോക്രോസ് പശ്ചാത്തലത്തിലൊരുങ്ങുന്നതായിരിക്കും അൽഫോൺസ്- നിവിൻ പോളി ചിത്രമെന്ന് സോഷ‍്യൽ മീഡിയയിൽ പ്രചാരണം ശക്തമാണ്. എന്നാൽ ഇത് സംബന്ധിച്ച് ഔദ‍്യോഗിക പ്രഖ‍്യാപനങ്ങളൊന്നും ഇതുവരെ ഉണ്ടായിട്ടില്ല.