അന്വേഷിക്കാൻ സമയമില്ലെന്ന് പൊലീസ് പറഞ്ഞതിനു പിന്നാലെ മോഷ്ടാക്കളിൽ നിന്ന് സ്വന്തം കാർ തിരികെ മോഷ്ടിച്ച് യുകെയിലെ ദമ്പതികൾ. വെസ്റ്റ് ലണ്ടനിലെ ബ്രൂക്ക് ഗ്രീനിൽ നിന്ന് ജൂൺ നാലിനാണ് മിയ ഫോർബ്സ് പിറീ- മാർക് സിംപ്സൺ ദമ്പതികളുടെ ജഗ്വാർ ഇ-പേസ് കാർ മോഷ്ടിക്കപ്പെട്ടത്. കാറിൽ സുരക്ഷാ മുൻകരുതലിന്‍റെ ഭാഗമായി എയർടാഗ് ലൊക്കേറ്റർ സ്ഥാപിച്ചതിനാൽ അധികം വൈകാതെ തന്നെ കാർ ചിസ്‌വിക്കിലുണ്ടെന്ന് ഇരുവരും ചേർന്ന് കണ്ടെത്തി.

ഇക്കാര്യം ഉടൻ തന്നെ പൊലീസിനെയും അറിയിച്ചു. പക്ഷേ, പെട്ടെന്ന് അന്വേഷണം നടത്തി കാർ കണ്ടെത്താൻ തങ്ങൾക്ക് സമയമില്ലെന്നായിരുന്നു പൊലീസിന്‍റെ മറുപടി. അതോടെ കാറിന്‍റെ ലൊക്കേഷനിലേക്ക് എത്തി ദമ്പതികൾ കാർ തിരിച്ചെടുക്കുകയായിരുന്നു. കാറിന്‍റെ ഇന്‍റീരിയർ മോഷ്ടാക്കൾ നശിപ്പിച്ചിരുന്നുവെന്നും ദമ്പതികൾ പറയുന്നു.

ലിങ്ക്ഡിൻ പോസ്റ്റിലൂടെയാണ് ഇക്കാര്യം ഫോർബ്സ് പിറീ പങ്കു വച്ചിരിക്കുന്നത്. കാർ തങ്ങൾ തിരിച്ച് സ്വന്തമാക്കിയതിനു പിന്നാലെ പൊലീസ് ബന്ധപ്പെട്ടുവെന്നും ഈ ആഴ്ച തന്നെ ഫൊറെൻസിക് സംഘവുമായെത്തി പരിശോധന നടത്താമെന്ന് ഉറപ്പു നൽകിയതായും പിറീ കുറിച്ചിട്ടുണ്ട്.