കോഴിക്കോട്: സംസ്ഥാന ശിശുക്ഷേമ സമിതിയുടെ അമ്മത്തൊട്ടിലിൽ 1001-ാമത്തെ കുഞ്ഞുമെത്തി. കോഴിക്കോട് ബീച്ച് ആശുപത്രിക്ക് സമീപത്തെ അമ്മത്തൊട്ടിലിലാണ് ഒരു പെൺകുഞ്ഞ് എത്തിയത്. ഈ കുഞ്ഞിന് സഹസ്രിക എന്ന് പേരിട്ടു.

ശനിയാഴ്ച ഉച്ചയ്ക്ക് 1.30-ഓടെയാണ് രണ്ട് മാസം പ്രായവും 4.200 കിഗ്രാം ഭാരവുമുള്ള കുരുന്നിനെ അമ്മത്തൊട്ടിലിൽ കണ്ടെത്തുകയായിരുന്നു. ചൊവ്വാഴ്ച പുലർച്ചെയാണ് അമ്മത്തൊട്ടിലിൽ 1000-ാമത്തെ കുട്ടിയെത്തിയത്. ഈ പെൺകുഞ്ഞിന് സഹസ്ര എന്നാണ് പേര് നൽകിയിരുന്നു.

ഈ വർഷം അമ്മത്തൊട്ടിലുകളിലെത്തുന്ന 13-ാമത്തെ കുഞ്ഞും ആറാമത്തെ പെൺകുഞ്ഞുമാണ് സഹസ്രിക. ആധുനിക സൗകര്യങ്ങളോടെ നവീകരിച്ച കോഴിക്കോട് ബീച്ച് ആശുപത്രിക്ക് സമീപത്തെ അമ്മത്തൊട്ടിലിലാണ് കുഞ്ഞതിഥിയെത്തിയത്.

2002-ൽ തിരുവനന്തപുരത്ത് തുടങ്ങിയതാണ് അമ്മത്തൊട്ടിൽ സംവിധാനം. ഉപേക്ഷിക്കപ്പെടുന്ന നവജാതശിശുക്കളെ സുരക്ഷിതമായി സംരക്ഷിക്കാനായി കേരള സർക്കാർ സാമൂഹ്യ നീതി വകുപ്പ് നടപ്പിലാക്കിയ പദ്ധതിയാണ് അമ്മത്തൊട്ടിൽ.