കണ്ണൂർ: പി.പി. ദിവ്യക്കെതിരെ പൊലീസിൽ പരാതി നൽകി മരിച്ച എഡിഎം നവീൻ ബാബുവിന്റെ സഹോദരൻ പ്രവീൺ ബാബു. കണ്ണൂർ സിറ്റി പൊലീസിനാണ് പരാതി നൽകിയത്. പി.പി. ദിവ്യക്കെതിരെയും ആരോപണം ഉന്നയിച്ച പ്രശാന്തിനെതിരെയും കേസെടുക്കണമെന്നാണ് ആവശ്യം. നവീൻ ബാബുവിനെ ദിവ്യ ഭീഷണിപ്പെടുത്തിയതായും ആത്മഹത്യ പ്രേരണകുറ്റം ചുമത്തി കേസെടുക്കണമെന്നാണ് ആവശ്യം.
നവീൻ ബാബുവിന്റെ മരണത്തിൽ ദിവ്യയുടെയും പെട്രോൾ പമ്പിന് അപേക്ഷ നൽകിയ പ്രശാന്തിന്റെയും പങ്ക് അന്വേഷിക്കണമെന്നും പരാതിയിൽ പറയുന്നു. അതേസമയം നവീൻ ബാബുവിന്റെ മരണത്തിൽ ദിവ്യക്കെതിരെ കേസെടുക്കണമെന്ന് ആവശ്യപ്പെട്ടാണ് മലയാലപ്പുഴ പഞ്ചായത്തിൽ കോൺഗ്രസും, ബിജെപിയും, ഹർത്താൽ ആചരിക്കുന്നത്.
കണ്ണൂരിൽ ബിജെപി ആഹ്വാനം ചെയ്ത ഹർത്താലും തുടങ്ങി. വൈകിട്ട് ആറ് വരെയാണ് ഹർത്താൽ. ദിവ്യയുടെ വീട്ടിലേക്ക് കോൺഗ്രസും ബിജെപിയും ബുധനാഴ്ച മാർച്ച് നടത്തും.