കെഎസ്ആർടിസി ബസുകളിൽ സ്ത്രീകൾക്കും ട്രാൻസ്‌ജെൻഡർ വിഭാഗക്കാർക്കും സൗജന്യയാത്ര അനുവദിക്കുന്ന യുഡിഎഫ് സർക്കാരിന്‍റെ 'പ്രിയദർശിനി സൗജന്യ യാത്രാ പദ്ധതി' വിവാദത്തിൽ. പദ്ധതി നടപ്പിലാക്കിയതിനു പിന്നാലെ, സാധാരണ ബസുകളെ സിറ്റി ഫാസ്റ്റ് ബസുകളായി ബ്രാൻഡ് ചെയ്ത് സൗജന്യയാത്ര അട്ടിമറിക്കാൻ ബോധപൂർവമായ ശ്രമം നടക്കുന്നതായി ചില യാത്രക്കാർ ആരോപിക്കുന്നു.

നൂറ് ദിവസത്തേക്ക് പരീക്ഷണാടിസ്ഥാനത്തിൽ നടപ്പാക്കുന്ന പദ്ധതിയുടെ ആദ്യഘട്ടത്തിൽ, തെരഞ്ഞെടുക്കപ്പെട്ട ഏഴ് വിഭാഗം ഓർഡിനറി ബസുകളിൽ മാത്രമാണ് സൗജന്യയാത്ര അനുവദിച്ചിരിക്കുന്നത്. സിറ്റി ഫാസ്റ്റ്, അന്തർജില്ലാ-അന്തർസംസ്ഥാന ഫാസ്റ്റ് പാസഞ്ചർ, സൂപ്പർ ഫാസ്റ്റ്, പ്രീമിയം, ലക്ഷ്വറി ബസുകൾ എന്നിവയെ പദ്ധതിയിൽ നിന്ന് ഒഴിവാക്കിയിട്ടുണ്ട്.

എന്നാൽ, തിരുവനന്തപുരം നഗരത്തിൽ പെട്ടെന്ന് സിറ്റി ഫാസ്റ്റ് ബസുകളുടെ എണ്ണം കൂടിയെന്നും, അതുവഴി യാത്രക്കാർക്ക് ലഭിക്കേണ്ട സൗജന്യയാത്ര നിഷേധിക്കപ്പെടുകയാണെന്നുമാണ് പ്രധാന ആരോപണം. സിറ്റി ഡിപ്പോയിൽ പാർക്ക് ചെയ്തിരുന്ന ബസുകളിൽ തിടുക്കത്തിൽ സിറ്റി ഫാസ്റ്റ് സ്റ്റിക്കറുകൾ പതിച്ചതായും യാത്രക്കാർ കുറ്റപ്പെടുത്തുന്നു.

ഔദ്യോഗിക വിശദീകരണം

എന്നാൽ, ഈ ആരോപണങ്ങൾ കെഎസ്ആർടിസി അധികൃതർ തള്ളി. പദ്ധതിയുടെ ആദ്യഘട്ടത്തിൽ സിറ്റി ഫാസ്റ്റ് സർവീസുകൾ ഉൾപ്പെടുത്തിയിട്ടില്ലെന്നും, ബസുകൾ യാത്രക്കാർക്ക് എളുപ്പത്തിൽ തിരിച്ചറിയാനാണ് സ്റ്റിക്കറുകൾ പതിച്ചതെന്നുമാണ് അധികൃതരുടെ വാദം.

തിരുവനന്തപുരം സിറ്റി ഡിപ്പോയിലെ 34 ഓർഡിനറി ബസുകളിലും 'പ്രിയദർശിനി സൗജന്യ യാത്രാ' സ്റ്റിക്കറുകൾ പതിച്ചിട്ടുണ്ട്. കൂടാതെ, നേരത്തെ മുതൽ സർവീസ് നടത്തിയിരുന്ന 47 സിറ്റി ഫാസ്റ്റ് ബസുകളിൽ മാത്രമാണ് സിറ്റി ഫാസ്റ്റ് സ്റ്റിക്കറുകൾ പതിച്ചതെന്നും ഡിപ്പോ അധികൃതർ വിശദീകരിച്ചു.

നിലവിലുള്ള യാത്രാ വിഭാഗങ്ങൾ

ഓർഡിനറി, സിറ്റി ഓർഡിനറി, ലിമിറ്റഡ് സ്റ്റോപ്പ് ഓർഡിനറി, പോയിന്‍റ്-ടു-പോയിന്‍റ്, ഗ്രാമവണ്ടി, ഫെയർ സ്റ്റേജ് ലിമിറ്റഡ് സ്റ്റോപ്പ്, ടൗൺ-ടു-ടൗൺ ലിമിറ്റഡ് സ്റ്റോപ്പ് എന്നീ സേവനങ്ങളിലാണ് നിലവിൽ സൗജന്യയാത്ര ലഭ്യമാകുന്നത്.

തിരുവനന്തപുരം ജില്ലയിൽ മാത്രം 384 സിറ്റി ഫാസ്റ്റ് ബസുകളും 687 ഓർഡിനറി ബസുകളുമാണ് പ്രവർത്തിക്കുന്നത്. സംസ്ഥാനത്തെ മറ്റ് ജില്ലകളെ അപേക്ഷിച്ച് തലസ്ഥാന നഗരിയിലാണ് കെഎസ്ആർടിസി സർവീസുകൾ കൂടുതലായി ഉള്ളത്.

ടിക്കറ്റ് നിരക്കിലെ വ്യത്യാസം

2022 ഏപ്രിൽ 30-ലെ സർക്കാർ ഉത്തരവ് പ്രകാരം, സിറ്റി ഫാസ്റ്റ് ബസുകളിൽ മിനിമം ചാർജ് 12 രൂപയും കിലോമീറ്ററിന് 1.03 രൂപയുമാണ്. സിറ്റി ഓർഡിനറി ബസുകളിൽ മിനിമം ചാർജ് 10 രൂപയും കിലോമീറ്ററിന് 1 രൂപയുമാണ്.

നിരക്കിലുള്ള ഈ ചെറിയ വ്യത്യാസവും സൗജന്യയാത്രയുടെ ലഭ്യതയും യാത്രക്കാരുടെ ഇടയിൽ ആശയക്കുഴപ്പത്തിന് വഴിവച്ചിരിക്കുകയാണ്.