ആലുവ: തിരുവനന്തപുരം - കാസർഗോഡ് വന്ദേഭാരത് എക്സ്പ്രസിൽ വാതക ചോർച്ച. കളമശേരി-ആലുവ സ്റ്റേഷന് ഇടയിൽ വച്ചാണ് സി 5 കോച്ചിൽ നിന്നും പുക ഉയരുന്നത് കാണുന്നത്. ഇതോടെ ട്രെയിൻ ആലുവയിൽ പിടിച്ചിട്ടു.

എസിയിൽ നിന്നാണ് വാതക ചോർച്ചയുണ്ടായതെന്നാണ് പ്രാഥമിക നിഗമനം. അധികൃതർ ഉടൻ തന്നെ സ്ഥലത്തെത്തി പരിശോധന നടത്തി. പുക ഉയർന്ന ഉടനെ സി 5 ബോഗിയിലെ യാത്രക്കാരെ മറ്റൊരു ബോഗിയിലേക്ക് മാറ്റിയതിനാൽ ആർക്കും ആരോഗ്യ പ്രശ്നങ്ങൾ ഉണ്ടായില്ലെന്നാണ് വിവരം. പ്രശ്നം പരിഹരിച്ച ശേഷം 9.20 ഓടെ ട്രെയിൻ ആലുവയിൽനിന്ന് പുറപ്പെട്ടു.