തിരുവനന്തപുരം: സംസ്ഥാനത്ത് ചൂട് ​തു​ട​രാ​ൻ സാധ്യത​യു​ള്ള​തി​നാ​ൽ പകൽ 11 മുതൽ 3 വരെ പുറത്തിറങ്ങുമ്പോൾ അ​തീ​വ​ശ്രദ്ധ പു​ല​ർ​ത്ത​ണ​മെ​ന്ന് കേന്ദ്ര കാലാവസ്ഥാ വകുപ്പിന്‍റെ മുന്നറിയിപ്പ്. ചൂടേറിയ പാലക്കാടൻ കാറ്റ് ചുരം വഴി പാലക്കാട്‌, തൃശൂർ മേഖലയിലേക്ക് വീശാൻ തുടങ്ങി​യ​ത് വേനൽ ആ​രം​ഭ​ത്തി​ന്‍റെ സൂചനയായി കാലാവസ്ഥാ വിദഗ്ദർ ചൂണ്ടിക്കാട്ടുന്നു.

വരും​ദിവസങ്ങളിൽ വേനൽ ശക്തമാകും. കൊല്ലം, പാലക്കാട് ജില്ലകളിൽ ഉയർന്ന താപനില 37 °C ലേ​ക്കും പത്തനംതിട്ട, തൃശൂർ, കോഴിക്കോട്, കണ്ണൂർ ജില്ലകളിൽ ഉയർന്ന താപനില 36°C ​ലേ​ക്കും ഉയരാൻ സാധ്യതയു​ണ്ട്. 2 °C മുതൽ 3 °C വരെ ചൂട് കൂ​ടാ​ൻ സാധ്യതയുള്ള ഈ ജില്ലകളിലെ ജനം കൂടുതൽ ജാഗ്രത പാലിക്കണം.

കാസർഗോഡ്, കോഴിക്കോട് ജില്ലകളിൽ സൂര്യാഘാതം റിപ്പോർട്ട് ചെയ്തതിനാൽ വെയിൽ നേരിട്ട് ദേഹത്ത് പതിക്കുന്ന ജോലികളിൽ നിന്ന് വൈകിട്ട് 3 വരെ ഒഴിവാകണമെന്നും സംസ്ഥാന ദുരന്ത നിവാരണ അതോറിറ്റി അറിയിച്ചു.