തിരുവനന്തപുരം: ജെസ്ന തിരോധാനക്കേസിൽ പിതാവ് സമർപ്പിച്ച ഹർജിയിൽ മറുപടി നൽകാൻ കൂടുതൽ സമയം ആവശ്യപ്പെട്ട് സിബിഐ. ജെസ്ന കേസിൽ അന്വേഷണം അവസാനിപ്പിച്ചതിനെതിരെ പിതാവ് ജെയിംസ് ജോസഫ് നൽകിയ ഹർജിയിൽ വിശദീകരണം നൽകാനാണ് സിബിഐ കൂടുടൽ സമയം ആവശ്യപ്പെട്ടത്. കേസ് ഏപ്രിൽ അഞ്ചിന് വീണ്ടും കോടതി പരിഗണിക്കും.
കഴിഞ്ഞ ചൊവ്വാഴ്ച കേസ് പരിഗണിക്കുന്നതിനിടെ സിജെഎം കോടതി സിബിഐയോട് വിശദീകരണം ചോദിച്ചിരുന്നു. എന്നാൽ വിശദീകരണം നൽകാൻ കൂടുതൽ സമയം അനുവദിക്കണമെന്നായിരുന്നു സിബിഐയുടെ ആവശ്യം. തുടർന്നാണ് കേസ് ഏപ്രിൽ അഞ്ചിലേക്ക് മാറ്റിയത്.
അതേസമയം, ജെസ്ന കേസുമായി ബന്ധപ്പെട്ട് മറ്റൊരു ഹർജികൂടി ചൊവ്വാഴ്ച കോടതിയിലെത്തി. ജെസ്നക്കേസിൽ കക്ഷിചേർക്കണമെന്ന് ആവശ്യപ്പെട്ട് എറണാകുളം സ്വദേശിയാണ് ഹർജി ഫയൽ ചെയ്തിരിക്കുന്നത്. മറ്റൊരു കേസിൽ ജയിലിൽ കഴിയുന്നതിനിടെ ജെസ്നയുടെ തിരോധാനവുമായി ബന്ധപ്പെട്ട് ചില വിവരങ്ങൾ ലഭിച്ചിട്ടുണ്ടെന്നും ഇക്കാര്യങ്ങൾ കോടതിയിൽ പറയാനാകുമെന്നാണ് ഹർജിയിൽ പറയുന്നത്. ഇതും ഏപ്രിൽ അഞ്ചിന് കോടതി പരിഗണിക്കും.