കെഎസ്ഇബി എന്ജിനീയര് പിടിയില്
കൊല്ലം: വ്യവസായ സ്ഥാപനത്തിനു വൈദ്യുതി കണക്ഷന് നല്കാന് 5000 രൂപ കൈക്കൂലി വാങ്ങിയ കെഎസ്ഇബി എന്ജിനീയറെ വിജിലന്സ് പിടികൂടി. കൊല്ലം കുമ്മല്ലൂരില് ശനിയാഴ്ചയാണ് സംഭവം.
ചാത്തനൂര് സെക്ഷന് ഓഫീസിലെ സബ് എന്ജിനീയറായ മുക്കത്തല സ്വദേശി ഐ. നസീര് (53) ആണ് പിടിയിലായത്. പുതിയ കറിപ്പൊടി നിര്മാണ കമ്പനിക്ക് വൈദ്യുതി കണക്ഷന് നല്കാനാണ് പ്രതി കൈക്കൂലി ആവശ്യപ്പെട്ടത്. ട്രാന്സ്ഫോമര് സ്ഥാപിച്ചിട്ടും വൈദ്യുതി കണക്ഷന് ലഭിക്കാതെ വന്നതോടെ കമ്പനിയുടെ മേല്നോട്ട ചുമതലയുള്ള ജീവനക്കാരന് സബ് എന്ജിനീയറായ നസീറിനെ സമീപിക്കുകയായിരുന്നു. എന്നാല് വൈദ്യുതി കണക്ഷന് നല്കാന് നസീര് 5000 രൂപ കൈക്കൂലി ആവശ്യപ്പെട്ടു. ഇതോടെ ജീവനക്കാരന് വിജിലന്സില് പരാതി നല്കുകയായിരുന്നു. തുടര്ന്ന് ശനിയാഴ്ച ഉച്ചയ്ക്ക് കമ്പനി പരിസരത്തുനിന്ന് കൈക്കൂലി സ്വീകരിക്കവേ നസീറിനെ വിജിലന്സ് അധികൃതര് കൈയ്യോടെ പിടികൂടുകയായിരുന്നു.