മലപ്പുറം: കാളികാവിൽ നരഭോജിക്കടുവയെ പിടികൂടുന്നതിനായി സ്ഥാപിച്ച കൂട്ടിൽ പുലി കുടുങ്ങി. കേരള എസ്റ്റേറ്റ് സി വൺ ഡിവിഷനിൽ വനംവകുപ്പ് സ്ഥാപിച്ച കൂട്ടിലാണ് പുലി കുടുങ്ങിയത്.

ഈ മാസം 15ന് കാളികാവിൽ ടാപ്പിങ് തൊഴിലാളിയായ കളപ്പറമ്പിൽ ഗഫൂർ അലിയെ (44) കടുവ കടിച്ചു കൊന്നിരുന്നു. ഇതിനു പിന്നാലെയാണ് ആർആർടി സംഘങ്ങൾ തെരച്ചിൽ നടത്തുകയും വിവധയിടങ്ങളിൽ കൂടുകൾ സ്ഥാപിക്കുകയും ചെയ്തത്. ഈ കൂട്ടിലാണ് ഇപ്പോൾ 15 ദിവസങ്ങൾക്കിപ്പുറം പുലി കുടുങ്ങുന്നത്.

ബുധനാഴ്ച രാത്രിയിൽ കരുവാരക്കുണ്ട് പ്രദേശത്ത് പുലി ഇറങ്ങി പ്രദേശവാസിയുടെ വളർത്തുനായയെ ആക്രമിക്കുകയും ചെയ്തിരുന്നു. കടുവയ്ക്കു പിന്നാലെ പ്രദേശത്ത് പുലിയിറങ്ങിയതോടെ പ്രദേശവാസികളെ കടുത്ത ആശങ്കയിലക്കിയിരുന്നു. അതേസമയം, കടുവയെ ഇതുവരെ പിടികൂടാനും സാധിച്ചിട്ടില്ല.