കൊച്ചി: 15 കാരൻ മിഹിര് അഹമ്മദ് ജീവനൊടുക്കിയ സംഭവത്തില് കൊച്ചിയിലെ ജെംസ് മോഡേണ് അക്കാദമി വൈസ് പ്രിന്സിപ്പലിന് സസ്പെൻഷൻ. ബിനു അസീസിനെയാണ് അന്വേഷണ വിധേയമായി സസ്പെന്ഡ് ചെയ്തത്. മിഹിര് നേരത്തെ പഠിച്ച സ്കൂളിലെ വൈസ് പ്രിന്സിപ്പലാണ് അസീസ്.
മിഹിര് അഹമ്മദ് ജീവനൊടുക്കിയ സംഭവത്തില് അന്വേഷണം ഊര്ജിതമാക്കിയതായി പൊലീസ് വ്യക്തമാക്കി. ബിനു അസീസിനെ പ്രത്യേക അന്വേഷണ സംഘം ചോദ്യം ചെയ്തിരുന്നു.
കേസന്വേഷണം നടത്തുന്ന ഹില്പാലസ് പൊലീസ് ഇന്സ്പെക്ടര് എ.എല്. യേശുദാസിന്റെ നേതൃത്വത്തിലുള്ള പത്തംഗ സംഘമാണ് വൈസ് പ്രിന്സിപ്പലിനെ പൊലീസ് സ്റ്റേഷനിലേക്ക് വിളിച്ചുവരുത്തി ചോദ്യം ചെയ്തത്. മുമ്പ് പഠിച്ച സ്കൂളിലെ വൈസ് പ്രിന്സിപ്പലില് നിന്ന് മിഹിറിന് മാനസിക പീഡനം നേരിടേണ്ടി വന്നിരുന്നുവെന്ന് അമ്മ മുഖ്യമന്ത്രിക്കടക്കം നല്കിയ പരാതിയില് പറഞ്ഞിരുന്നു.
ജെംസ് മോഡേണ് അക്കാദമി പ്രിന്സിപ്പല് എംബിഎക്കാരനാണെന്നാണ് പൊലീസ് പറയുന്നത്. എന്നാല് ഇദ്ദേഹം സ്കൂള് കുട്ടികളെ എന്ത് പഠിപ്പിക്കുന്നു എന്നതിനൊന്നും വ്യക്തമായ ഉത്തരം പൊലീസിന് ലഭിച്ചിട്ടില്ല. ഇദ്ദേഹത്തെ ചോദ്യം ചെയ്യാനായി ഇനിയും വിളിപ്പിച്ചേക്കുമെന്നാണ് സൂചന.