തിരുവനന്തപുരം: സ്കൂൾ തുറക്കലുമായി ബന്ധപ്പെട്ട് മന്ത്രി വി. ശിവൻകുട്ടി ഉന്നത ഉദ്യോഗസ്ഥരുടെ യോഗം വിളിച്ചു ചേർത്തു. ജില്ലാ കലക്റ്റർമാർ, തദ്ദേശസ്വയംഭരണ സ്ഥാപനങ്ങളിലെ പ്രതിനിധികൾ തുടങ്ങിയവരുടെ യോഗമാണ് ചേർന്നത്. പൊതുവിദ്യാഭ്യാസ ഡയറക്റ്റർ ഷാനവാസ്, വിദ്യാഭ്യാസ വകുപ്പിലെ മറ്റു ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.
കുട്ടികളുടെ സുരക്ഷയെ മുൻനിർത്തി സ്കൂൾ കെട്ടിടത്തിന്റെ ഫിറ്റ്നസ് നിർബന്ധമായും സ്കൂൾ അധികൃതർ വാങ്ങണം. വാടക കെട്ടിടത്തിൽ പ്രവർത്തിക്കുന്ന സ്കൂളുകളും ഫിറ്റ്നസ് സർട്ടിഫിക്കറ്റ് വാങ്ങണം. നിർമാണ പ്രവർത്തനങ്ങൾ നടക്കുന്ന സ്കൂളുകൾ കുട്ടികളുടെ പൂർണ സുരക്ഷിതത്വം ഉറപ്പാക്കുന്ന രീതിയിൽ പണി നടക്കുന്ന സ്ഥലം മറച്ചു വയ്ക്കണം. സ്കൂളിനു മുന്നിലുള്ള പ്രചാരണ സാമഗ്രികൾ, കൊടിതോരണങ്ങൾ, ബോർഡുകൾ, ഹോർഡിങ്സ് എന്നിവ അതത് തദ്ദേശസ്വയംഭരണ സ്ഥാപനങ്ങളുമായി ബന്ധപ്പെട്ട് നീക്കം ചെയ്യണം. വിദ്യാലയങ്ങൾക്ക് സമീപം മുന്നറിയിപ്പ് ബോർഡുകൾ, ട്രാഫിക് സൈൻബോർഡുകൾ എന്നിവ സ്ഥാപിക്കുന്നതിനുള്ള നടപടികൾ സ്വീകരിക്കണം. സാഹചര്യങ്ങൾ മനസിലാക്കി അപകട സാധ്യതാ മുന്നറിയിപ്പ് ബോർഡുകൾ സ്ഥാപിക്കണം.
സ്കൂളിലും പരിസരത്തും അപകടകരമായ നിലയിൽ മരങ്ങളോ, മരച്ചില്ലകളോ ഉണ്ടെങ്കിൽ അവ മുറിച്ചു മാറ്റുന്നതിനുള്ള നടപടികൾ സ്വീകരിക്കണം. സ്കൂളിലേക്കുള്ള വഴി, സ്കൂൾപരിസരം എന്നിവിടങ്ങളിലുള്ള വൈദ്യുത പോസ്റ്റ്, ഇലക്ട്രിക് ലൈൻ, സ്റ്റേവയർ, സുരക്ഷാ വേലികൾ ഇല്ലാതെയുള്ള ട്രാൻസ്ഫോർമറുകൾ മുതലായ അപകടകരമായി കാണുകയാണെങ്കിൽ ആയത് ബന്ധപ്പെട്ട വകുപ്പുകളെ അറിയിച്ച് നടപടികൾ സ്വീകരിക്കണം. സ്കൂളുകളിൽ ഇഴജന്തുക്കൾ കയറിയിരിക്കാൻ സാധ്യതയുള്ള ഇടങ്ങൾ സൂക്ഷ്മമായി പരിശോധിച്ച് അവയുടെ സാന്നിധ്യമില്ലെന്ന് ഉറപ്പു വരുത്തണം. റെയ്ൽ ക്രോസിന് സമീപമുള്ള വിദ്യാലയങ്ങളിലെ കുട്ടികൾക്ക് അപകടരഹിതമായി ട്രാക്ക് മുറിച്ചു കടക്കുന്നതിനുള്ള സംവിധാനമൊരുക്കണം. സ്കൂളിന് ചുറ്റുമുള്ള കടകളിൽ കൃത്യമായ പരിശോധന നടത്തേണ്ടതും ലഹരി പദാർഥങ്ങൾ വിൽക്കുന്നില്ലായെന്ന് ഉറപ്പു വരുത്തുകയും ചെയ്യണം. ക്ലാസുകൾ തുടങ്ങിയശേഷം കുട്ടികൾ ഏതെങ്കിലും കാരണവശാൽ ക്ലാസിൽ നിശ്ചിത സമയം കഴിഞ്ഞ് എത്തിയില്ലെങ്കിൽ രക്ഷിതാക്കളെ വിളിച്ച് വിവരമറിയിക്കണം.
പിടിഎയുടെ നേതൃത്വത്തിൽ സ്കൂൾ തുറക്കുന്നതിന് മുന്നോടിയായി സമ്പൂർണ ശുചീകരണം നടത്തണം. സ്കൂൾ തുറക്കുന്ന ദിവസം തന്നെ ഉച്ചഭക്ഷണ വിതരണം ആരംഭിക്കണം. പാചകതൊഴിലാളികൾ ഹെൽത്ത്കാർഡ് എടുത്തുവെന്ന് ഉറപ്പുവരുത്തണം. പട്ടികവർഗ വിഭാഗത്തിൽപ്പെട്ട കുട്ടികളെ വിദ്യാലയങ്ങളിൽ എത്തിക്കുന്നതിന് പദ്ധതി ആവിഷ്കരിക്കണം. സ്കൂൾ ലാൻഡ് ഫോൺ പ്രവർത്തിക്കുന്നുണ്ടെന്ന് പ്രഥമാധ്യാപകർ ഉറപ്പുവരുത്തണം. ഐടി ഉപകരണങ്ങൾ പ്രവർത്തനക്ഷമമാക്കണം. വിദ്യാവാഹിനി പദ്ധതി സ്കൂൾ തുറക്കുന്ന ദിവസം മുതൽ ആരംഭിക്കുന്നുവെന്ന് ഉറപ്പു വരുത്തണം. എല്ലാ സ്കൂളുകളിലും സ്കൂൾ സുരക്ഷാ പ്ലാൻ അഥവാ സ്കൂൾ ദുരന്ത നിവാരണ പ്ലാൻ തയാറാക്കണം. സ്കൂൾ ബസിൽ കയറ്റാവുന്ന കുട്ടികളുടെ എണ്ണം, വാഹനത്തിന്റെ ഫിറ്റ്നസ് എന്നിവ സംബന്ധിച്ച് മോട്ടോർ വാഹന വകുപ്പ് ഉറപ്പുവരുത്തണം. കുട്ടികൾ സഞ്ചരിക്കുന്ന വാഹനങ്ങളിലെ ജീവനക്കാരുടെ സ്വഭാവം വിലയിരുത്തി പൊലീസ് ക്ലിയറൻസ് സർട്ടിഫിക്കറ്റ് വാങ്ങണം.