ആലപ്പുഴ : അറുപത്തൊമ്പതാമത് നെഹ്റു ട്രോഫി വള്ളംകളി ഇന്ന്. ഉച്ചയ്ക്ക് രണ്ടിന് മുഖ്യമന്ത്രി പിണറായി വിജയൻ ഉദ്ഘാടനം നിർവഹിക്കും. അഞ്ചു മന്ത്രിമാർ, ഹൈക്കോടതി ചീഫ് ജസ്റ്റിസ്, സതേൺ എയർ കമാന്റിങ് ഇൻ ചീഫ്, ജില്ലയിലെ എംപിമാർ, എംഎൽഎമാർ തുടങ്ങിയവർ ഉദ്ഘാടനസമ്മേളനത്തിൽ പങ്കെടുക്കും. ജില്ലാ പോലീസ് മേധാവി ചൈത്ര തെരേസ ജോണിന്റെ നേതൃത്വത്തിൽ 20 ഡിവൈഎസ്പി, 50 ഇൻസ്പെക്ടർ, 465 എസ്ഐ എന്നിവരുൾപ്പടെ രണ്ടായിരത്തോളം പോലീസ് ഉദ്യോഗസ്ഥരെ സുരക്ഷാ കാര്യങ്ങൾക്കായി വിന്യസിച്ചിട്ടുണ്ട്. രാവിലെ പതിനൊന്നിനു മത്സരങ്ങൾ ആരംഭിക്കും.
ചുണ്ടൻ വള്ളങ്ങളുടെ ഹീറ്റ്സ് മത്സരങ്ങളും ചെറുവള്ളങ്ങളുടെ ഫൈനൽ മത്സരങ്ങളും ഉദ്ഘാടന സമ്മേളനത്തിനു ശേഷം നടക്കും. ഫൈനൽ മത്സരങ്ങൾ വൈകുന്നേരം നാലു മുതലാണ്. ചുണ്ടൻ വള്ളങ്ങളുടെ മത്സരത്തിൽ അഞ്ചു ഹീറ്റ്സുകളാണുള്ളത്. ആദ്യ നാലു ഹീറ്റ്സുകളിൽ നാലു വീതം വള്ളങ്ങളും അഞ്ചാമത്തെ ഹീറ്റ്സിൽ മൂന്നു വള്ളങ്ങളും മത്സരിക്കും. ആദ്യമെത്തുന്ന നാലു വള്ളങ്ങൾ ഫൈനൽ പോരാട്ടത്തിനായി ഇറങ്ങും. ചെറുവള്ളങ്ങളുടെ എല്ലാ വിഭാഗങ്ങളിലും ഫിനിഷ് ചെയ്യുന്ന സമയം പരിഗണിച്ചു ജേതാക്കളെ തീരുമാനിക്കും. എഴുപത്തിരണ്ടു വള്ളങ്ങളാണ് ഒമ്പതു വിഭാഗങ്ങളിലായി നെഹ്റു ട്രോഫിയിൽ മത്സരിക്കുന്നത്.