തൃശൂർ: കേന്ദ്ര മന്ത്രിയും നടനുമായ സുരേഷ് ഗോപിയുടെ മാലയില്‍ പുലിപ്പല്ലുണ്ടെന്ന പരാതിയില്‍ അന്വേഷണം തുടങ്ങി വനംവകുപ്പ്. കേസില്‍ പരാതിക്കാരായ യൂത്ത് കോൺഗ്രസ് നേതാവ് എ.എ. മുഹമ്മദ് ഹാഷിമിയോട് മൊഴി നൽകാന്‍ പട്ടിക്കാട് റേഞ്ച് ഓഫീസർ നോട്ടീസ് നൽകി. ജൂലൈ 21ന് നേരിട്ട് ഹാജരായി തെളിവുകളും രേഖകളും ഹാജരാക്കാനാണ് നോട്ടീസില്‍ അറിയിച്ചിരിക്കുന്നത്.

വേടന്‍റെ പുലിപ്പൽ കേസിനു പിന്നാലെയാണ് സുരേഷ് ഗോപിക്കെതിരായ പരാതി ഉയരുന്നത്. തുടർന്ന് കഴിഞ്ഞ മാസം 16ന് സംസ്ഥാന പൊലീസ് മേധാവിക്ക് ഹാഷിം പരാതി നല്‍കിയിരുന്നത്. പുലിപ്പല്ല് മാല ധരിച്ച് നടക്കുന്ന സുരേഷ് ഗോപിയുടെ ദൃശ്യങ്ങള്‍ സഹിതം നൽകിയായിരുന്നു പരാതി. ഈ പരാതി പിന്നീട് വനംവകുപ്പിന് കൈമാറുകയായിരുന്നു.