ചാലക്കുടി: മുരിങ്ങൂരിൽ ദേശീയപാത നിർമാണം നടക്കുന്ന പ്രദേശത്ത് പുതുതായി നിർമിച്ച സർവീസ് റോഡ് ഇടിഞ്ഞു. ഒഴിവായത് വലിയ അപകടം. തൃശൂർ - എറണാകുളം പാതയിൽ മുരിങ്ങൂർ ലക്ഷ്മി നരസിംഹ മൂർത്തി ക്ഷേത്രത്തിനു മുന്നിലാണ് റോഡ് ഇടിഞ്ഞത്. ഇതിനെത്തുടർന്ന് വീണ്ടും ഗതാഗതക്കുരുക്ക് രൂക്ഷമാവുകയാണ്.

ഞായറാഴ്ച രാവിലെ ആറരയോടെയായിരുന്നു സംഭവം. കനത്ത മഴയെ തുടർന്നാണ് പുതുതായി നിർമിച്ച സർവീസ് റോഡ് ഇടിഞ്ഞു താഴന്നത്.

മതിയായ സുരക്ഷയൊരുക്കാതെ റോഡിന്‍റെ വശങ്ങൾ 15 അടിയോളം താഴ്ത്തി മണ്ണെടുക്കുകയായിരുന്നു. തുടർന്ന് മഴ പെയ്തപ്പോൾ റോഡിന്‍റെ വശങ്ങൾ ഇടിഞ്ഞു. ഈ സമയം വാഹനങ്ങൾ വരാതിരുന്നത് വലിയ അപകടം ഒഴിവാക്കി.

അടിപ്പാത നിർമാണവുമായി ബന്ധപ്പെട്ട് സമാന്തര റോഡ് പണിയാൻ ഭിത്തി കെട്ടുന്നതിനായി കോൺക്രീറ്റ് സ്ലാബുകൾ സ്ഥാപിക്കാതെ കുഴിയെടുക്കുന്നതാണ് ഇത്തരത്തിൽ റോഡ് ഇടിയാൻ കാരണമെന്നു നാട്ടുകാർ പറയുന്നു.

ഇപ്പോൾ ഇടിഞ്ഞ ഭാഗത്ത് അടിയന്തരമായി സുരക്ഷ ഒരുക്കിയില്ലെങ്കിൽ എറണാകുളം ഭാഗത്തേക്ക് പോകുന്ന വാഹനങ്ങൾക്ക് ഒട്ടും കടന്നുപോകാനാകാതെ വരും. നിലവിൽ പൊലീസ് നിയന്ത്രണത്തിലാണ് വാഹനങ്ങൾ കടന്നു പോകുന്നത്.