മുംബൈ: ഇന്ന് രാവിലെ ഭയന്ദർ ഈസ്റ്റ് ലെ ജനസാന്ദ്രതയുള്ള ആസാദ് നഗർ ചേരിയിൽ വൻ തീപിടിത്തത്തിൽ ഒരാൾ മരിക്കുകയും മൂന്ന് പേർക്ക് പൊള്ളലേൽക്കുകയും ചെയ്തു. ഇതിൽ ഒരാളുടെ നില ഗുരുതരമാണ്. ദീപക് ചൗരസ്യ എന്നയാളാണ് മരിച്ചത്. ശിവാജി സാവന്ത് എന്നയാൾക്കാണ് പരിക്കേറ്റത്.
രാവിലെ 6 മണിയോടെയാണ് തീപിടിത്തമുണ്ടായത്, സ്ക്രാപ്പ് ഗോഡൗണിൽ നിന്നാണ് തീ പടർന്നതെന്ന് കരുതുന്നു. ഗ്യാസ് സിലിണ്ടർ പൊട്ടിത്തെറിച്ചതാകാം എന്നാണ് നിഗമനം. പൊട്ടിത്തെറിയുടെ ശബ്ദം കേട്ടെങ്കിലും തീപിടിത്തത്തിന്റെ കാരണം കണ്ടെത്താനായിട്ടില്ല. 50-ലധികം ഗോഡൗണുകളും വ്യാപാര സ്ഥാപനങ്ങളും അഗ്നിക്കിരയായി.
മീരാ ഭയന്ദർ മുനിസിപ്പൽ കോർപ്പറേഷൻ (എംബിഎംസി), ബിഎംസി, താനെ, വസായ്-വിരാർ മുനിസിപ്പൽ കോർപ്പറേഷനുകളിൽ നിന്നുള്ള 24 ലധികം ഫയർ ഫോഴ്സ് വാഹനങ്ങളാണ് തീയണക്കാൻ എത്തിയത്.തീപിടിത്തം അറിഞ്ഞയുടൻ പ്രദേശവാസികൾ വീടുകളിൽ നിന്ന് ഇറങ്ങിയോടിയത് കൊണ്ട് അപകടം കുറഞ്ഞു എന്നാണ് കരുതുന്നത്. പരിക്കേറ്റവരെ സിവിൽ ആശുപത്രിയിൽ പ്രവേശിപ്പിച്ചു.