ന്യൂഡൽഹി: കൊൽക്കത്തയിലെ സർക്കാർ മെഡിക്കൽ കോളെജിൽ പിജി ട്രെയ്നി ഡോക്ടറെ ബലാത്സംഗം ചെയ്ത് കൊന്നതിനെത്തുടർന്ന് രാജ്യത്താകമാനം ഡോക്ടർമാരും നഴ്സുമാരും ആരോഗ്യരംഗത്തെ മറ്റു ജീവനക്കാരും പ്രതിഷേധം തുടരുന്നു. ഇതിന്റെ പശ്ചാത്തലത്തിൽ എല്ലാ സംസ്ഥാനങ്ങളും രണ്ടു മണിക്കൂർ ഇടവിട്ട് ക്രമസമാധന നില വിലയിരുത്തുന്ന റിപ്പോർട്ടുകൾ നൽകണമെന്ന് കേന്ദ്ര സർക്കാർ നിർദേശിച്ചു.
ഓഗസ്റ്റ് ഒമ്പതിനാണ് കോൽക്കത്തയിലെ ആർജി കർ മെഡിക്കൽ കോളെജിൽ ഡ്യൂട്ടിക്കിടെ പിജി ഡോക്ടർ ക്രൂരമായി കൊല്ലപ്പെടുന്നത്. തൊട്ടടുത്ത ദിവസം കോൽക്കത്ത പൊലീസിലെ ഒരു സിവിക് വൊളന്റിയർ കേസുമായി ബന്ധപ്പെട്ട് അറസ്റ്റിൽ. കൽക്കട്ട ഹൈക്കോടതി പിന്നീട് കേസ് സിബിഐക്കു കൈമാറുകയും ചെയ്തിരുന്നു.
ഇതേ ആശുപത്രിയിൽ കൊലപാതകത്തിൽ പ്രതിഷേധിച്ച് പ്രകടനം നടത്തിയ സ്ത്രീകളെ പുറത്തുനിന്ന് അതിക്രമിച്ചു കയറിയ സംഘം ആക്രമിക്കുകയും ചെയ്തിരുന്നു. ഇതോടെ രാജ്യത്തിന്റെ വിവിധ ഭാഗങ്ങളിൽ പ്രതിഷേധം കനത്തിരിക്കുകയാണ്.
പലയിടങ്ങളിലും ആശുപത്രികളുടെ പ്രവർത്തനങ്ങളെയും സമരം ബാധിച്ചുതുടങ്ങിയിട്ടുണ്ട്.
ആരോഗ്യ മേഖലയിൽ പ്രവർത്തിക്കുന്നവരുടെ സംരക്ഷണത്തിന് കേന്ദ്ര നിയമം നടപ്പാക്കണമെന്നും, ആശുപത്രികളെ സെയ്ഫ് സോണുകളായി പ്രഖ്യാപിക്കണമെന്നുമാണ് സമരരംഗത്തുള്ള ആരോഗ്യ പ്രവർത്തകരുടെ പ്രധാന ആവശ്യങ്ങൾ.