തിരുവനന്തപുരം: ലോക്സഭാ തെരഞ്ഞെടുപ്പില് ബിജെപിക്കെതിരെ അതിശക്തമായ അടിയൊഴുക്ക് ഉണ്ടെന്നും അത് ഇന്ത്യാ മുന്നണിക്ക് അനുകൂലമായിട്ടുണ്ടെന്നും കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെ. ഒന്നാംഘട്ട തെരഞ്ഞെടുപ്പ് കഴിഞ്ഞപ്പോള് ഈ അടിയൊഴുക്ക് തിരിച്ചറിഞ്ഞാണ് പ്രധാനമന്ത്രി നരേന്ദ്രമോദി വര്ഗീയ- വിദ്വേഷ പ്രസംഗങ്ങളിലേക്ക് തിരിഞ്ഞിരിക്കുന്നത്. കെപിസിസി മാധ്യമ സമിതി ഇന്ദിര ഭവനില് സംഘടിപ്പിച്ച മുഖാമുഖത്തില് സംസാരിക്കുകയായിരുന്നു അദ്ദേഹം.
മക്കളുടെ എണ്ണവും മംഗല്യസൂത്രവുമൊക്കെ പറഞ്ഞാണ് മോദി ഇപ്പോള് വോട്ടുപിടിക്കുന്നത്. ഇതൊക്കെ ആരെ ലക്ഷ്യമിട്ടാണെന്ന് എല്ലാവര്ക്കും അറിയാം. ജനങ്ങളെ മതത്തിന്റെ പേരില് വേര്തിരിച്ച് കാണാന് പാടില്ല. ഒരു മതവിഭാഗത്തില് മാത്രമല്ല കുട്ടികള് കൂടുന്നത്. ഗ്യാരന്റികള് നല്കുക എന്നതു മാത്രമാണ് മോദിയുടെ ഗ്യാരന്റി. മോദി പെരുംനുണയനാണ്- അദ്ദേഹം കുറ്റപ്പെടുത്തി.
തൊഴിലില്ലായ്മയും നാണ്യപ്പെരുപ്പവുമാണ് രാജ്യത്തെ പ്രധാന പ്രശ്നം. എന്നാല് അതേക്കുറിച്ച് മോദി മിണ്ടുന്നതേയില്ല. കോണ്ഗ്രസ് നല്കുന്ന വാഗ്ദാനങ്ങളെല്ലാം നടപ്പാക്കുന്ന ഉറപ്പുകളാണ്. തെരഞ്ഞെടുപ്പ് കമ്മിഷനെ നിയമിക്കുന്നതും തെരഞ്ഞെടുപ്പ് നടത്തുന്നതുമെല്ലാം മോദിയാണ്. അതുകൊണ്ടുതന്നെ പരാതികളില് പരിഹാരമില്ല. മോദിയുടെ തെരഞ്ഞെടുപ്പ് ചട്ടലംഘനങ്ങള്ക്കെതിരേ കമ്മീഷന് നിശബ്ദമാണ്. കേരളത്തില് യുഡിഎഫ് ഇരുപതില് 20 സീറ്റും ജയിക്കുമെന്നും അദ്ദേഹം ചൂണ്ടിക്കാട്ടി.
കെപിസിസി ആക്റ്റിങ് പ്രസിഡന്റ് എം.എം. ഹസന്, പ്രതിപക്ഷ നേതാവ് വി.ഡി. സതീശന്, എഐസിസി ജനറല് സെക്രട്ടറി ദീപാദാസ് മുന്ഷി, എഐസിസി സെക്രട്ടറി വിശ്വനാഥ പെരുമാള്, തിരുവനന്തപുരം, ആറ്റിങ്ങല് മണ്ഡലങ്ങളിലെ സ്ഥാനാര്ഥികളായ ശശി തരൂര്, അടൂര് പ്രകാശ്, മാധ്യമ സമിതി അധ്യക്ഷന് ചെറിയാന് ഫിലിപ്പ് എന്നിവരും പങ്കെടുത്തു.