ഭോപ്പാൽ: മധ്യപ്രദേശിൽ അജ്ഞാത ജീവിയുടെ കടിയേറ്റ് രണ്ടാഴ്ചയ്ക്കിടെ 6 മരണം. റാബിസ് വൈറസ് ബാധിച്ച ഏതോ ഒരു ജീവിയാണ് കടിച്ചതെന്നാണ് ഗ്രാമവാസികൾ പറയുന്നത്. എന്നാൽ ഇത് ഏത് മൃഗമാണെന്ന കാര്യത്തിൽ വ്യക്തതയില്ല.

മധ്യപ്രദേശിലെ ബർവാനിയിലാണ് സംഭവം. മേയ് 5 ന് പുലർച്ചെയാണ് ഉറങ്ങിക്കിടന്ന 17 പേരെ ഈ മൃഗം കടിക്കുന്നത്. തുടർന്ന് റാബിസ് വാക്സിൻ എടുത്തെങ്കിലും ഇതിൽ 40 നും 60 ഇടയിൽ പ്രായമുള്ള 6 പേർ മരിക്കുകയായിരുന്നു.

ചിലർ ഇതിനെ കാണാൻ നായയെ പോലെ ഉണ്ടെന്നാണ് പറയുന്നത്. മറ്റു ചിലർ കഴുതപുലിയോട് സാദ്യശ്യപ്പെടുത്തുന്നു. എന്നാൽ ഈ ജീവി നായയെ പോലെ കുരയ്ക്കുന്നില്ല. മുരളുക മാത്രമേ ഉള്ളൂ എന്നും ഗ്രാമവാസികൾ പറയുന്നു.

കടിയേറ്റ മുറിവുകളുടെ അസാധാരണത്വവും, രോ​ഗം അതിവേ​ഗം നാഡീവ്യവസ്ഥയെ ബാധിക്കുന്നുണ്ടെന്നും ഡോക്ടർമാ‌ർ അറിയിച്ചതായി റിപ്പോ‌ർട്ടുകളുണ്ട്. ഇതുവരെ ഇത്തരത്തിലൊരു മുറിവേറ്റ പാട് കണ്ടിട്ടില്ലെന്നും മരിച്ചവരുടെ ആന്തരികാവയവങ്ങൾ, തലച്ചോറ് തുടങ്ങിയവ കൃത്യമായ പഠനത്തിന് വിധേയമാക്കാനായി ഡൽഹിയിലെ വൈറോളജി ലാബിലേക്ക് അയച്ചിട്ടുണ്ടെന്നും ഡോക്‌ടർമാർ അറിയിച്ചു. ഈ റിപ്പോർട്ടുകൾ ലഭിച്ചാൽ മാത്രമേ റാബിസ് മൂലമാണോ മറ്റെന്തെങ്കിലുമാണോ മരണങ്ങൾക്ക് കാരണമെന്ന് സ്ഥിരീകരിക്കാൻ കഴിയൂവെന്ന് ആരോഗ്യ വകുപ്പ് അറിയിച്ചു.