അഹമ്മദാബാദ്: അപകീർത്തിക്കേസിൽ രാഹുൽ ഗാന്ധിക്ക് ശിക്ഷ വിധിച്ച സൂറത്ത് കോടതി ചീഫ് ജുഡീഷ്യൽ മജിസ്ട്രേറ്റിന് സ്ഥാനക്കയറ്റം. സൂറത്ത് സിജെഎം ആയിരുന്ന ജസ്റ്റിസ് ഹദീരേഷ് എച്ച് വർമയെയാണ് രാജ്കോട്ട് ജില്ലാ ജഡ്ജിയായി നിയമിച്ചത്.

ലോക്സഭാ തെരഞ്ഞെടുപ്പിന് മുന്നോടിയായി 2019 ൽ കർണാടകയിലെ കോലാറിൽ നടത്തിയ പ്രസംഗത്തിനിടെയാണ് രാഹുൽ ഗാന്ധി വിവാദ പരാമർശം ഉയർത്തിയത്. 'എല്ലാ കള്ളൻ മാർക്കും മോദി എന്ന പേരുള്ളത് എന്തുകൊണ്ട്' എന്ന പരാമർശത്തിനിരേ ബിജെപി നേതാവ് പൂർണേഷ് മോദിയാണ് പരാതി നൽകിയത്.

രാഹുൽ കുറ്റക്കാരനാണെന്ന് സിജെഎം കോടതി കണ്ടെത്തുകയും 2 വർഷത്തേക്ക് തടവ് ശിക്ഷ വിധിക്കുകയും ചെയ്തിരുന്നു. ഇതിനെതിരേ രാഹുൽ സെക്ഷൻസ് കോടതിയെ സമീപിച്ചെങ്കിലും വിധിക്ക് സ്റ്റേ ലഭിച്ചില്ല. തുടർന്ന് രാഹുൽ ഗാന്ധി ഹൈക്കോടതിയെ സമീപിക്കുകയായിരുന്നു. സ്റ്റേ ലഭിക്കാത്തതിനാൽ, പാർലമെന്‍റംഗത്വത്തിനു പ്രഖ്യാപിക്കപ്പെട്ട അയോഗ്യതയും തുടരുകയാണ്.