ദുബായ്: ദുബായിയുടെ വികസനത്തിൽ പങ്കാളികളായ പ്രവാസി തൊഴിലാളികൾക്കായി ജനറൽ ഡയറക്റ്ററേറ്റ് ഓഫ് ഐഡന്‍റിറ്റി ആൻഡ് ഫോറിനേഴ്‌സ് അഫയേഴ്സും പെർമനന്‍റ് കമ്മിറ്റി ഫോർ ലേബർ അഫയേഴ്സും സംയുക്തമായി വിപുലമായ ബലി പെരുന്നാൾ ആഘോഷങ്ങൾ സംഘടിപ്പിച്ചു. ദുബായ് അൽ ഖൂസ് പ്രധാന വേദിയായ പരിപാടിയിൽ 1,27,000-ത്തിലധികം തൊഴിലാളികളാണ് പങ്കെടുത്തത്.

ആദ്യ രണ്ട് ദിവസങ്ങളിലെ നേരിട്ടുള്ള പരിപാടികളിൽ 55,000 പേരും, 31 ലേബർ ക്യാമ്പുകളിലെ പരിപാടികളിൽ 51,000 പേരും പങ്കെടുത്തു. നേരിട്ട് എത്താൻ കഴിയാത്ത 21,758 പേർ ‘ബ്ലൂ കണക്ട്’ എന്ന ഡിജിറ്റൽ പ്ലാറ്റ്‌ഫോം വഴി ആഘോഷങ്ങളുടെ ഭാഗമായി.

ബോളിവുഡ് താരങ്ങളുടെ സാന്നിധ്യവും വിവിധ രാജ്യങ്ങളിൽ നിന്നുള്ള കലാകാരന്മാരുടെ പ്രകടനങ്ങളും ഉണ്ടായിരുന്നു. നറുക്കെടുപ്പിലൂടെ 4 കാറുകൾ ഉൾപ്പെടെ 600 സമ്മാനങ്ങൾ തൊഴിലാളികൾക്ക് വിതരണം ചെയ്തു.

ഡു ടെലികോം, മലബാർ ഗോൾഡ് ആൻഡ് ഡയമണ്ട്സ്, നൂൺ ഫുഡ്, വെസ്റ്റേൺ യൂണിയൻ തുടങ്ങിയ പ്രമുഖ ബ്രാൻഡുകളാണ് പരിപാടി സ്പോൺസർ ചെയ്തത്.

"തൊഴിലാളികൾ ദുബായിയുടെ വികസന യാത്രയിലെ പ്രധാന പങ്കാളികളാണ്. നേരിട്ടും ഡിജിറ്റൽ സംവിധാനങ്ങളിലൂടെയും ഇത്രയും വലിയ ജനവിഭാഗത്തെ ഉൾക്കൊള്ളാൻ കഴിഞ്ഞത് പദ്ധതിയുടെ വലിയ വിജയമാണ്." ദുബായ് ഇമിഗ്രേഷൻ ഡെപ്യൂട്ടി ഡയറക്റ്റർ ജനറൽ മേജർ ജനറൽ ഉബൈദ് മുഹൈർ ബിൻ സുറൂർ പറഞ്ഞു.