ഷാർജ: എച്ച്​കെ ഗ്രൂപ്പ് ഓഫ് ഇൻസ്റ്റിറ്റ്യൂഷൻസിന്‍റെ നേതൃത്വത്തിൽ നിശ്ചയദാർഢ്യ കുട്ടികൾക്ക് വേണ്ടി എച്ച്​കെ ബ്രിഡ്ജ് എജുക്കേഷൻ അക്കാഡമി എന്ന പേരിൽ പുതിയ സ്ഥാപനം ഷാർജയിൽ പ്രവർത്തനം തുടങ്ങി. ലയൺസ് ക്ലബ് ഇന്‍റർനാഷണൽ മിഡിൽ ഈസ്റ്റിന്‍റെ ഡിസ്ട്രിക്റ്റ് ഗവർണർ അഗസ്റ്റോ ഡീ പിയെട്രോ അക്കാഡമിയുടെ ഉദ്ഘാടനം നിർവഹിച്ചു.

പ്രമുഖ ശിശുരോഗവിദഗ്​ധനും ആന്‍റണി മെഡിക്കൽ സെന്‍റർ മാനേജിങ്​ ഡയറക്റ്ററുമായ ഡോ. ഡെയിസ് ആന്‍റണി മുഖ്യാതിഥിയായിരുന്നു. എച്ച്​.കെ ബ്രിഡ്ജ് എജുക്കേഷൻ അക്കഡമിയുടെ ആദ്യ നിയമനം മുഹമ്മദ് താഹ മസൂദിന് ചടങ്ങിൽ കൈമാറി. എച്ച്​കെ ഗ്രൂപ്പ്​ ഓഫ്​ ഇൻസ്റ്റിറ്റ്യൂഷൻസിന്‍റെ ഉപദേശക സമിതി അംഗങ്ങളായ സന്തോഷ് കുമാർ കെട്ടത്ത്, സുനിൽ ഗംഗാധരൻ, മോഹനചന്ദ്രൻ മേനോൻ, ശോഭ മോഹൻ, ജോസഫ് തോമസ്, വിജയ മാധവൻ, ടി.എൻ. കൃഷ്ണകുമാർ, എസ്​എഫ്​ ഇഗ്നേഷ്യസ് എന്നിവരും സാമൂഹിക,സാംസ്കാരിക മേഖലയിലെ പ്രമുഖരും ചടങ്ങിൽ പങ്കെടുത്തു.

നിശ്ചയദാർഢ്യ വിഭാഗം കുട്ടികളുടെ പഠനവും ശോഭനമായ ഭാവിയും ലക്ഷ്യം വെച്ച് ലാഭേച്ഛകൂടാതെ പ്രവർത്തിക്കുന്ന സ്ഥാപനമാണ്​​ ഹരീഷ്​ കണ്ണൻ സ്ഥാപിച്ച എച്ച്​കെ ഗ്രൂപ്പ്​ ഓഫ്​ ഇൻസ്റ്റിറ്റ്യൂഷനെന്ന് ഉപദേശക സമിതി അംഗങ്ങൾ പറഞ്ഞു. നിശ്ചയദാർഢ്യവിഭാഗത്തിന്​ മികച്ച വിദ്യാഭ്യാസം നൽകി ശാക്​തീകരിക്കുകയാണ്​ ബ്രിഡ്ജ്​ എജുകേഷൻ അകാഡമിയിലൂടെ ലക്ഷ്യം വെക്കുന്നതെന്ന്​ ഹരീഷ്​ കണ്ണൻ വാർത്താ സമ്മേളനത്തിൽ പറഞ്ഞു. പഠന ബുദ്ധിമുട്ടുകൾ, ശ്രദ്ധാപരിമിതികൾ, മാനസിക വെല്ലുവിളികൾ എന്നിവ മൂലം സ്കൂളുമായി പൊരുത്തപ്പെടാൻ ബുദ്ധിമുട്ടുന്ന, എന്നാൽ പരമ്പരാഗത പ്രത്യേക വിദ്യാഭ്യാസം ആവശ്യമായി വരാത്ത വിദ്യാർഥികൾക്കായി പ്രത്യേകം രൂപകൽപന ചെയ്ത പാഠ്യക്രമമാണ് ​ ബ്രിഡ്ജ് ​ എജുക്കേഷൻ പിന്തുടരുന്നത്​.

ഇന്ത്യൻ നാഷണൽ ഇൻസ്റ്റിറ്റ്യൂട്ട് ഓഫ് ഓപ്പൺ സ്കൂളിങ്​ അംഗീകരിച്ച പാഠ്യപദ്ധതിയാണ് പിന്തുടരുന്നത്. 10, 12 ക്ലാസ് യോഗ്യത നേടാനുമുള്ള സൗകര്യം ഇത് വിദ്യാർത്ഥികൾക്ക് നൽകുന്നു. ഓരോ വിദ്യാർഥിക്കും ​ഐഇപി അടിസ്ഥാനമാക്കി കുറഞ്ഞ അധ്യാപക വിദ്യാർഥി അനുപാതത്തിൽ വ്യക്തിഗത പഠനാനുഭവം നൽകുന്നു. വിദ്യാർഥികൾ നേരിടുന്ന വെല്ലുവിളികൾക്ക് പരിഹാരം കാണാൻ തെറാപ്പിസ്റ്റുകളും അധ്യാപകരും ഒന്നിച്ചാണ് പ്രവർത്തിക്കുന്നത്, ഇത് പഠനപ്രക്രിയയെ കൂടുതൽ ഫലപ്രദമാകുമെന്നും അദ്ദേഹം പറഞ്ഞു. സൗമ്യ ഹരീഷ്​, സന്തോഷ്​ കേട്ടത്ത്​, ടി.എൻ കൃഷ്ണകുമാർ, വി.എസ്​ ബിജുകുമാർ എന്നിവരും വാർത്താ സമ്മേളനത്തിൽ പ​ങ്കെടുത്തു.