ടെഹ്റാൻ: കഴിഞ്ഞ ഫെബ്രുവരിയിൽ യുഎസ് ആക്രമണത്തിൽ കൊല്ലപ്പെട്ട മുൻ പരമോന്നത നേതാവ് ആയത്തുള്ള അലി ഖമനേയിയുടെ സംസ്കാരച്ചടങ്ങുകൾക്കായുള്ള തയാറെടുപ്പുകൾ പുരോഗമിക്കുകയാണ്. ഈയവസരത്തിൽ ലോകം ഉറ്റു നോക്കുന്നത് പുതിയ പരമോന്നത നേതാവായ മൊജ്തബ ഖമനേയി തന്‍റെ പിതാവിന്‍റെ സംസ്കാരച്ചടങ്ങിൽ നേരിട്ടു പങ്കെടുക്കുമോ എന്നതാണ്.

ഇറാന്‍റെ പരമോന്നത നേതാവായി തെരഞ്ഞെടുക്കപ്പെട്ടതിനു ശേഷം മൊജ്തബ ഇതുവരെ ഒരു പൊതുവേദിയിലും പ്രത്യക്ഷപ്പെട്ടിട്ടില്ല. അതിനാൽ തന്നെ ഈ സംസ്കാരച്ചടങ്ങിൽ പങ്കെടുത്താൽ ആദ്യമായി മൊജ്തബ പങ്കെടുത്ത പൊതുവേദിയായി അലി ഖമനേയിയുടെ സംസ്കാരച്ചടങ്ങ് മാറും.

ജൂലൈ നാലു മുതലാണ് അലി ഖമനേയിയുടെ സംസ്കാരച്ചടങ്ങുകൾ ആരംഭിക്കുന്നത്. ഖോം ഉൾപ്പടെയുള്ള പുണ്യ സ്ഥലങ്ങളിലൂടെയുള്ള വിലാപയാത്ര ജൂലൈ ഒൻപതിന് മഷാദിലെത്തും.

ഒൻപതാം തിയതിയാണ് ഖബറടക്കം. ഖമനേയിയുടെ സംസ്കാരച്ചടങ്ങിലും വിലാപയാത്രയിലും വൻ ജനാവലി പങ്കെടുക്കുമെന്നാണ് റിപ്പോർട്ടുകൾ. ഇതേസമയമാണ് നിലവിലെ പരമോന്നത നേതാവും അലി ഖമനേയിയുടെ മകനുമായ മൊജ്തബ ഖമനേയി ചടങ്ങിൽ പങ്കെടുക്കുമോ എന്ന ചോദ്യം ഉയരുന്നത്.