ദുബായ്: ഈ വർഷം ആദ്യ പകുതിയിൽ ദുബായിൽ 98.8 ലക്ഷത്തിലധികം വിദേശ സഞ്ചാരികൾ എത്തിയതായി ദുബായ് സാമ്പത്തിക, ടൂറിസം വകുപ്പ് അറിയിച്ചു. കഴിഞ്ഞ വർഷത്തെ ഇതേ കാലയളവിനെ അപേക്ഷിച്ച് 6 ശതമാനം വർധനവാണ് രേഖപ്പെടുത്തിയിട്ടുള്ളത്.

ലോകത്തിലെ ഏറ്റവും മികച്ച മൂന്ന് ആഗോള ടൂറിസം കേന്ദ്രങ്ങളിൽ ഒന്നായി ദുബായ് നഗരത്തെ മാറ്റിയെടുക്കാനുള്ള യുഎഇ വൈസ് പ്രസിഡന്‍റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തൂമിന്‍റെ ദർശനത്തിന്‍റെ തെളിവാണ് ഈ നേട്ടമെന്ന് ദുബായ് കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം പറഞ്ഞു.

''ശക്തമായ പൊതു-സ്വകാര്യ പങ്കാളിത്തവും ഫലപ്രദമായ ആഗോള മാർക്കറ്റിംഗ് തന്ത്രവുമാണ് ഈ നേട്ടത്തിനു പിന്നിൽ''- ഷെയ്ഖ് ഹംദാൻ എക്സ് പ്ലാറ്റ് ഫോമിൽ കുറിച്ചു.

തന്ത്രപ്രധാനമായ സ്ഥാനം, മികച്ച കണക്റ്റിവിറ്റി, ലോകോത്തര അടിസ്ഥാന സൗകര്യങ്ങൾ എന്നിവ ദുബായ് നഗരത്തെ പ്രിയപ്പെട്ട ആഗോള യാത്രാ ലക്ഷ്യസ്ഥാനമാക്കി മാറ്റുന്നത്തിൽ നിർണായക പങ്ക് വഹിക്കുന്നു.