ദുബായ്: വനിതാ ടി20 ലോകകപ്പിൽ പാക്കിസ്ഥാനെതിരേയുള്ള മത്സരത്തിൽ നിർണായക പങ്കു വഹിച്ച മലയാളി താരങ്ങളെ ഉൾപ്പെടുത്തി വീഡിയോ പുറത്തു വിട്ട് ഐസിസി. പാക്കിസ്ഥാനെതിരേ വിജയം നേടുമ്പോൾ മലയാളി താരം സജന സജീവനായിരുന്നു ക്രീസിൽ ഉണ്ടായിരുന്നു. എട്ട് പന്തിൽ രണ്ട് റൺസാണ് വിജയത്തിനാവശ്യം. ക്യാപ്റ്റൻ ഹർമൻ പ്രീത് കൗർ റിട്ടയേഡ് ഹർട്ടായതിനു പിന്നാലെയാണ് സജന ക്രീസിലെത്തിയത്.
ഒരു പന്തിൽ ഫോർ നേടി സജന ടീമിന്റെ വിജയം ഉറപ്പാക്കി. ഫോർ നേടിയതിനു ശേഷം സജന പവലിയനിലേക്ക് മടങ്ങുമ്പോൾ മറ്റൊരു മലയാളി താരമായ ആശ ശോഭന അഭിനന്ദിക്കാനെത്തിയതാണ് ഐസിസി വിഡിയോയിലൂടെ പങ്കു വച്ചിരിക്കുന്നത്. അടിച്ചു കേറി വാ എന്ന ഹിറ്റ് ഡയലോഗോടു കൂടിയാണ് ആശ സജനയെ സ്വീകരിക്കുന്നത്. സജനയും ഡയലോഗ് ആവർത്തിക്കുന്നുണ്ട്.
ഈ രംഗത്തെയാണ് അടിച്ചു കേറി വാ എന്ന ഡയലോഗ് കൂടി ബാക് ഗ്രൗണ്ടിൽ ചേർത്ത് മോളിവുഡ് സ്റ്റാർ എന്ന പേരിൽ ഐസിസി പങ്കു വച്ചിരിക്കുന്നത്. മറ്റു ടീമംഗങ്ങളുടെ ആഘോഷവും വീഡിയോയിലുണ്ട്. ആദ്യമായാണ് ഐസിസി വനിതാ ടി 20 ലോകകപ്പിൽ രണ്ട് മലയാളികൾ ഉൾപ്പെടുന്നത്.