ലോകം മുഴുവൻ വാലന്റൈൻസ് വീക്ക് ആഘോഷിക്കുന്നതിന്റെ തിരക്കിലാണ്. പ്രണയം നഷ്ടപ്പെട്ടവർക്ക് എക്സിനോടുള്ള കലി തീർക്കാനുള്ള പുതിയ ഉപാധിയുമായി എത്തിയിരിക്കുകയാണ് ചില മൃഗശാലകൾ. പാറ്റയ്ക്കും പുഴുവിനും എലികൾക്കുമെല്ലാം എക്സിന്റെ പേരിട്ട് വിളിച്ച് കലി തീർക്കാനാണ് അവസരം. സാൻ അന്റോണിയോ മൃഗശാലയിൽ ക്രൈ മി എ കോക്റോച്ച് എന്ന പരിപാടിയിൽ 18 വയസിനു മുകളിലുള്ളവർക്കാണ് അവസരം. വെറും അഞ്ച് ഡോളർ കൊടുത്താൽ ഏതെങ്കിലും പച്ചക്കറിക്ക് എക്സിന്റെ പേരിടാം. പത്ത് ഡോളർ നൽകിയാൽ പാറ്റയ്ക്കും 25 ഡോളർ നൽകിയാൽ എലിക്കും എക്സിന്റെ പേരിട്ട് വിളിക്കാം.
ഇല്ലിനോയ്സിലെ ബ്രൂക് ഫീൽഡ് മൃഗശാലയിൽ മഡഗാസ്കർ പാറ്റകൾക്ക് പേരിടാനാണ് അവസരം. 15 ഡോളറാണ് ഇതിന് നൽകേണ്ടത്.പുഴുക്കൾക്ക് മുൻ കാമുകന്റെയോ കാമുകിയുടെയോ പേരിടാനുള്ള അവസരമാണ് ഓഹിയോയിലെ കൊളമ്പസ് മൃഗശാല നൽകുന്നത്.
ഇങ്ങനെ എക്സിന്റെ പേരിട്ട് വിളിക്കുന്ന പുഴുക്കളെ മറ്റു ജീവികൾക്ക് തിന്നാനും കൊടുക്കാം. ഇതു വഴി സന്തോഷം ലഭിക്കുമെന്നു മാത്രമല്ല മൃഗങ്ങളെ പരിപാലിക്കാനും സാധിക്കുമെന്നാണ് മൃഗശാല അധികൃതരുടെ അവകാശവാദം.