കോട്ടയം: കാഞ്ഞിരപ്പള്ളി പ്രൈവറ്റ് ബസ് സ്റ്റാൻഡിൽ വച്ച് പെണ്കുട്ടിയുടെ പഴ്സും, പണവും മോഷ്ടിച്ച കേസിൽ യുവാവിനെ പൊലീസ് അറസ്റ്റ് ചെയ്തു. പത്തനംതിട്ട ചാത്തൻകേരി ഭാഗത്ത് കന്യാകോണിൽ വീട്ടിൽ കെ.എസ് ജോഷിമോൻ (33) എന്നയാളെയാണ് കാഞ്ഞിരപ്പള്ളി പൊലീസ് അറസ്റ്റ് ചെയ്തത്.
ഇയാൾ ബുധനാഴ്ച വൈകിട്ട് നാലരയോടെ കാഞ്ഞിരപ്പള്ളി പ്രൈവറ്റ് ബസ്റ്റാൻഡിൽ വച്ച് ബസിൽ കയറുകയായിരുന്ന പെണ്കുട്ടിയുടെ ഷോൾഡർ ബാഗിൽ നിന്നും പഴ്സ് തട്ടിയെടുത്ത് കടന്നുകളയാൻ ശ്രമിക്കുകയായിരുന്നു. പെൺകുട്ടി ബഹളം വച്ചതിനെ തുടർന്ന് നാട്ടുകാർ ഇയാളെ പിടികൂടി പൊലീസ് സ്റ്റേഷനിൽ വിവരം അറിയിക്കുകയും, കാഞ്ഞിരപ്പള്ളി പൊലീസ് സ്ഥലത്തെത്തി ഇയാളെ അറസ്റ്റ് ചെയ്യുകയുമായിരുന്നു.
കാഞ്ഞിരപ്പള്ളി സ്റ്റേഷൻ എസ്.എച്ച്.ഓ പ്രസാദ് അബ്രഹാം വർഗീസിന്റെ നേതൃത്വത്തിലാണ് ഇയാളെ അറസ്റ്റ് ചെയ്തത്. ജോഷിമോന് പുളിക്കീഴ് സ്റ്റേഷനിൽ ക്രിമിനൽ കേസ് നിലവിലുണ്ട്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.