പാലക്കാട്: പാലക്കാട് വല്ലപ്പുഴയില് നിന്ന് കാണാതായ 15കാരിയെ ഗോവയില് നിന്ന് കണ്ടെത്തി. മലയാളികളായ വിനോദസഞ്ചാരികളാണ് കുട്ടിയെ ഗോവയില് നിന്ന് കണ്ടെത്തിയത്. ആറ് ദിവസം മുന്പാണ് കുട്ടിയെ പാലക്കാട് നിന്ന് കാണാതായത്. നിലവില് ഗോവ പൊലീസിന്റെ സംരക്ഷണയിലാണ് കുട്ടി.
നേരത്തെ പട്ടാമ്പി റെയില്വേ സ്റ്റേഷനില് നിന്ന് പരശുറാം എക്സ്പ്രസില് കുട്ടി യാത്ര ചെയ്തിരുന്നതായി പൊലീസിന് വിവരം ലഭിച്ചിരുന്നു. ഇതിന്റെ അടിസ്ഥാനത്തില് കുട്ടിക്കൊപ്പം യാത്ര ചെയ്തെന്ന് സംശയിച്ച വ്യക്തിയുടെ രേഖാചിത്രവും പൊലീസ് പുറത്തുവിട്ടിരുന്നു. എന്നാല് ഇതിന്റെ അടിസ്ഥാനത്തില് നടത്തിയ അന്വേഷണത്തില് തുമ്പൊന്നും ലഭിച്ചിരുന്നില്ല.
വീട്ടിൽ നിന്നു ട്യൂഷനു പോയ പെൺകുട്ടി കൂട്ടുകാരെ തെറ്റിദ്ധരിപ്പിച്ച് ബന്ധു വീട്ടിലേക്കെന്ന വ്യാജേന നാടു വിടുകയായിരുന്നു. കൂട്ടുകാരികളുടെ മുന്നിൽ നിന്നു തന്നെ വസ്ത്രം മാറി മുഖമടക്കം മറച്ച് ബുർഖ ധരിച്ചാണ് പെൺകുട്ടി പോയത്.പെണ്കുട്ടി സ്കൂളില് എത്താത്തതിനെ തുടര്ന്ന് അദ്ധ്യാപകര് മാതാപിതാക്കളെ വിവരം ധരിപ്പിച്ചു. തുടർന്ന് കുടുംബം പൊലീസിൽ പരാതി നൽകുകയായിരുന്നു.