പത്തനംതിട്ട : ഓമല്ലൂർ റോഡിൽ പാറ കയറ്റിവന്ന ടിപ്പർ സ്കൂട്ടറിന് മുകളിലേക്ക് മറിഞ്ഞ് സ്ക്കൂട്ടർ യാത്രക്കാരൻ മരിച്ചു. പ്രക്കാനം തൊട്ടുപുറം സ്വദേശി പി എസ് സാമുവേലാണ് മരിച്ചത്. ഉച്ചക്ക് ഒരു മണിയോടെ പത്തനംതിട്ട കുളം ജംഷനിലാണ് അപകടം ഉണ്ടായത്. പാറക്കല്ലുമായി പത്തനംതിട്ട ഭാഗത്തേക്ക് വന്ന ടിപ്പർ ലോറി നിയന്ത്രണം വിട്ട് സ്കൂട്ടറിന് മുകളിലേക്ക് മറിയുകയായിരുന്നു.

പാറക്കല്ലുകൾക്കടിയിൽ പെട്ടു പോയ സാമുവേലിനെ പത്തനംതിട്ടയിലെ സ്വകാര്യ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ലോറിക്കടിയിൽ പെട്ട സ്കൂട്ടർ പൂർണ്ണമായും തകർന്നു. പോലീസും ഫയർഫോഴ്സും നാട്ടുകാരും ചേർന്ന് രക്ഷാപ്രവർത്തനം നടത്തി . മറിഞ്ഞ ലോറി ക്രെയിൻ ഉപയോഗിച്ച് ഉയർത്തിയാണ് ലോറി ഡ്രൈവറെ രക്ഷപ്പെടുത്തിയത്. അപകടത്തെ തുടർന്ന് ഏറെ നേരം പത്തനംതിട്ട അടൂർ റൂട്ടിൽ ഗതാഗതം തടസ്സപ്പെട്ടു.