ന്യൂഡല്‍ഹി: വാണിജ്യാവശ്യത്തിനുള്ള പാചകവാതക സിലിണ്ടറിന്‍റെ വില വീണ്ടും കൂട്ടി. 19 കിലോഗ്രാം സിലിണ്ടറിന് 61 രൂപ 50 പൈസയാണ് വര്‍ധിപ്പിച്ചത്. അതേസമയം ഗാര്‍ഹിക സിലിണ്ടര്‍ വിലയില്‍ മാറ്റമില്ല.

ഇതോടെ പുതുക്കിയ വില അനുസരിച്ച് കൊച്ചിയില്‍ വാണിജ്യാവശ്യത്തിനുള്ള പാചക വാതക സിലിണ്ടറിന്‍റെ വില 1810.50 രൂപയായി. നേരത്തെ 1749 രൂപയായിരുന്നു വില. ഡല്‍ഹി (1802 രൂപ), മുംബൈ (1754 രൂപ), കൊല്‍ക്കത്ത (1911 രൂപ), ചെന്നൈ (1964.50 രൂപ) എന്നിങ്ങനെയാണ് പുതുക്കിയ നിരക്ക്.

കഴിഞ്ഞമാസം വാണിജ്യാവശ്യത്തിനുള്ള പാചക വാതക സിലിണ്ടറിന്‍റെ വിലയില്‍ 50 രൂപയുടെ വര്‍ധനയാണ് ഉണ്ടായത്. സെപ്റ്റംബറില്‍ 39 രൂപയാണ് വര്‍ധിപ്പിച്ചത്. ഇതോടെ 4 മാസത്തിനിടെ 157.50 രൂപയാണ് കൂടിയത്.