ഇടുക്കി: പ്രവേശനോത്സവത്തിനിടെ അടിമാലി ഗവൺമെന്‍റ് ഹൈസ്കൂളിൽ രക്ഷിതാക്കളുടെ പ്രതിഷേധം. മുന്നറിയിപ്പില്ലാതെ ഇംഗ്ലീഷ് മീഡിയം ഡിവിഷൻ നിർത്തലാക്കിയതിനെ ചൊല്ലിയാണ് പ്രതിഷേധം. രക്ഷിതാക്കൾ പ്രധാന അധ്യാപികയെ ഉപരോധിച്ചു.

കുട്ടികൾ കുറവായതിനാൽ ഇംഗ്ലീഷ് മീഡിയം ഡിവിഷൻ നിലനിർത്താനാവില്ലെന്നാണ് അധ്യാപകർ പറയുന്നത്. 6 കുട്ടികൾ മാത്രമാണ് ഈ ഡിവിഷനിലുള്ളത്. ഈ ഡിവിഷൻ തുടരാനുള്ള അധ്യാപകരില്ലെന്നും സ്കൂൾ അധികൃതർ പറയുന്നു.

എന്നാൽ ഡിവിഷൻ നിർത്തലാക്കുന്ന വിവരം അറിയിച്ചത് മേയ് 30 മാത്രമാണെന്ന് രക്ഷിതാക്കൾ ആരോപിക്കുന്നു. ഇതോടെ കുട്ടികൾക്ക് മറ്റൊരു സ്കൂളിലും പ്രവേശനം എടുക്കാനായില്ലെന്നും 8 വർഷം ഇംഗ്ലീഷ് മീഡിയം പഠിച്ച് ഇനി മലയാളം മീഡിയത്തിലേക്ക് മാറുന്നത് അപ്രായോഗികമാണെന്നുമാണ് രക്ഷിതാക്കൾ പറയുന്നു.