കോഴിക്കോട്: ബേപ്പൂരിൽ മത്സ്യ ബന്ധന ബോട്ടിന് തീപിടിച്ച് 2 പേർക്ക് പൊള്ളലേറ്റു. ലക്ഷദ്വീപ് സ്വദേശികളായ താജുല് അക്ബര്, റഫീഖ് എന്നിവര്ക്കാണ് പൊള്ളലേറ്റത്. ഇരുവരുടെയും ശരീരത്തിന്റെ 70 ശതമാനത്തോളം പൊള്ളലേറ്റു. ഇരുവരും മെഡിക്കല് കോളെജ് ആശുപത്രിയില് ചികിത്സയിലാണ്. ബോട്ട് പൂർണമായും കത്തി നശിച്ചു.
ബേപ്പൂര് ഹാര്ബറില് അല്ഫിഷറീസ് എന്ന ബോട്ടാണ് കത്തിനശിച്ചത്. മത്സ്യബന്ധനത്തിന് പുറപ്പെടാന് തുടങ്ങുമ്പോഴാണ് ബോട്ടിന്റെ എഞ്ചിനില് തീ പടര്ന്നത്. മീഞ്ചന്ത, ബീച്ച്, നരിക്കുനി, മുക്കം എന്നിവിടങ്ങളില്നിന്ന് അഗ്നിരക്ഷാ സേനാംഗങ്ങൾ എത്തിയാണ് തീയണച്ചത്. ബോട്ടിലുണ്ടായിരുന്ന ഗ്യാസ് സിലിണ്ടറുകള് വലിയ ശബ്ദത്തോടെ പൊട്ടിത്തെറിച്ചാണ് അപകടം.