'തപാൽ വോട്ട് തിരുത്തൽ'; ജി. സുധാകരന്‍റെ മൊഴി രേഖപ്പെടുത്തി

ആലപ്പുഴ: തപാൽ വോട്ട് തിരുത്തിയെന്ന വെളിപ്പെടുത്തലിൽ മുൻ മന്ത്രിയും മുതിർന്ന സിപിഎം നേതാവുമായ ജി. സുധാകരന്‍റെ മൊഴി രേഖപ്പെടുത്തി. കേസെടുക്കാൻ മുഖ്യ തെരഞ്ഞെടുപ്പ് കമ്മിഷണർ നിർദേശം നൽകിയതിനു പിന്നാലെയാണ് മൊഴി രേഖപ്പെടുത്തിയത്.

തഹസിൽദാർ കെ. അൻവറിന്‍റെ നേതൃത്വത്തിലുള്ള സംഘം സുധാകരന്‍റെ വീട്ടിലെത്തിയാണ് മൊഴിയെടുത്തത്. തെരഞ്ഞെടുപ്പ് ഉദ്യോഗസ്ഥരടക്കമുള്ളവർ സംഘത്തിലുണ്ടായിരുന്നു. ഉച്ചയ്ക്കു ശേഷം എത്തിയ ഉദ്യോഗസ്ഥർ അരമണിക്കൂറോളം മൊഴിയെടുത്ത് മടങ്ങി.

മൊഴിയെടുപ്പ് പൂർത്തിയായെന്നും വിശദമായ റിപ്പോർട്ട് കലക്റ്റർക്ക് നൽകുമെന്നും ഉദ്യോഗസ്ഥർ അറിയിച്ചു. പറയാനുള്ളതെല്ലാം ഉദ്യോഗസ്ഥരോട് പറഞ്ഞിട്ടുണ്ടെന്നും മറ്റൊന്നും പറയാനില്ലെന്നും മൊഴിയെടുപ്പിന് ശേഷം സുധാകരൻ മാധ്യമങ്ങളോട് പ്രതികരിച്ചു.