കൊച്ചി: ബ്രഹ്മപുരത്തെ തീപിടുത്തത്തിൽ അട്ടിമറിയില്ലെന്ന് പൊലീസ് അന്വേഷണ റിപ്പോർട്ട്. മാലിന്യക്കൂമ്പാരത്തിന്റെ അടിത്തട്ടിൽ ഉയർന്ന താപനില തുടരുകയാണ്. അതിനാൽ പ്ലാന്റിൽ ഇനിയും തീപിടിക്കാനുള്ള സാധ്യതയുണ്ടെന്നും റിപ്പോർട്ടിൽ പറയുന്നു.
ഇന്നലെ വൈകിട്ടാണ് സിറ്റി പൊലീസ് കമ്മീഷണർ കെ സേതുരാമൻ ഇ-മെയിൽ വഴി റിപ്പോർട്ട് ഡിജിപിക്ക് കൈമാറിയത്. അട്ടിമറി നടന്നിട്ടുണ്ടോ എന്നതുറപ്പിക്കാനുള്ള വിശദമായ അന്വേഷണം പുരോഗമിക്കുകയാണെന്നും റിപ്പോർട്ടിൽ സൂചിപ്പിച്ചിട്ടുണ്ട്. കത്തിയ മാലിന്യത്തിന്റെ സാമ്പിളിന്റെ ഫൊറൻസിക് റിപ്പോർട്ടും, തീപിടുത്തമുണ്ടായ സ്ഥലത്തിന്റെ ഉപഗ്രഹ ചിത്രങ്ങളും റിപ്പോർട്ടും കേസിൽ നിർണ്ണായകമാണ്. ഈ റിപ്പോർട്ടിന്റെ അടിസ്ഥാനത്തിലെ അന്തിമ തീരുമാനത്തിൽ എത്തിച്ചേരാൻ സാധിക്കത്തുള്ളൂ എന്നും കമ്മീഷണർ കൈമാറിയ റിപ്പോർട്ടിൽ പറയുന്നു.