തിരൂർ: ചാർജ് ചെയ്യുന്നതിനിടെ പവർബാങ്ക് പൊട്ടിത്തെറിച്ചതിനു പിന്നാലെ വീട് പൂർണമായും കത്തി നശിച്ചു. തിരൂർ തലക്കാട് പഞ്ചായത്തിലെ മുക്കിലപ്പീടിക അബൂബക്കർ സിദ്ദിഖിന്‍റെ വീടാണ് കത്തിയത്. ഓല മേഞ്ഞ വീടായതിനാൽ തീ പെട്ടെന്ന് ആളിപ്പടരുകയായിരുന്നു. സംഭവ സമയത്ത് വീട്ടിൽ മറ്റാരുമുണ്ടായിരുന്നില്ല. പവർ ബാങ്ക് ചാർജറിൽ കുത്തിയിട്ടിരിക്കുകയായിരുന്നു.

തിരൂർ ഫയർഫോഴ്സ് എത്തുമ്പോഴേക്കും നാട്ടുകാർ തീ പാതിയും അണച്ചിരുന്നു. ബന്ധുവീട്ടിലേക്ക് സന്ദർശനത്തിന് പോയ സിദ്ദിഖിനെയും കുടുംബത്തിനെയും നാട്ടുകാരാണ് വിവരം അറിയിച്ചത്. പൊലീസ് അന്വേഷണം ആരംഭിച്ചിട്ടുണ്ട്.