പത്തനംതിട്ട: പത്തനംതിട്ടയിൽ കനാലിൽ ഒഴുക്കിൽപ്പെട്ട് കാണാതായ വിദ്യാർഥികൾ മരിച്ചു. മെഴുവേലി സ്വദേശി അഭിരാജ്, അനന്തു നാഥ് എന്നിവരാണ് മരിച്ചത്. പത്തനംതിട്ട കിടങ്ങന്നൂർ നാക്കാലിക്കൽ എസ്വിജിഎച്ച്എസിലെ വിദ്യാർഥികളാണ് ഇരുവരും.
കിടങ്ങന്നൂരിലെ കനാലിന് സമീപത്തുനിന്ന് ഇവരുടെയും വസ്ത്രങ്ങൾ കണ്ടെത്തിയതിന് പിന്നാലെ ശനിയാഴ്ച തന്നെ ശക്തമായ തെരച്ചിൽ നടത്തിയിരുന്നു. കനാലിൽ കുളിക്കാനിറങ്ങിയപ്പോൾ ഒഴുക്കിൽപെട്ടതാവാമെന്ന സംശയത്തിലായിരുന്നു തെരച്ചിൽ. എന്നാൽ കുട്ടികളെ കണ്ടെത്താനായിരുന്നില്ല. തുടർന്ന് രാവിലെ വീണ്ടും തെരച്ചിൽ പുനരാരംഭിച്ചപ്പോഴാണ് മൃതദേഹങ്ങൾ കണ്ടെത്തിയത്. മൃതദേഹങ്ങൾ ആശുപത്രിയിലേക്ക് മാറ്റി. നിയമപരമായ നടപടിക്രമങ്ങൾക്ക് ശേഷം ബന്ധുക്കൾക്ക് വിട്ടു നൽകും.