ഷാർജ: പോപ്പ് ഫ്രാൻസിസിന്‍റെ വിയോഗത്തിൽ ഷാർജ ഇന്ത്യൻ അസോസിയേഷൻ അനുശോചനം അറിയിച്ചു. എളിമയുടെയും കാരുണ്യത്തിന്‍റെയും സാർവത്രിക സ്നേഹത്തിന്‍റെയും ദീപസ്തംഭമായി നിലകൊണ്ട ഫ്രാൻസിസ് പാപ്പ, ശബ്ദമില്ലാത്തവർക്കും പാർശ്വവൽക്കരിക്കപ്പെട്ടവർക്കും വേണ്ടിയുള്ള സേവനത്തിന്‍റെയും ഉൾക്കൊള്ളലിന്‍റെയും സമാനതകളില്ലാത്ത പാരമ്പര്യം അവശേഷിപ്പിച്ചുവെന്ന് അസോസിയേഷൻ അനുശോചന സന്ദേശത്തിൽ പറഞ്ഞു.

"ദരിദ്രർക്കുവേണ്ടിയുള്ള ശബ്ദമായും, പാർശ്വവൽക്കരിക്കപ്പെട്ടവരുടെ സുഹൃത്തായും, സമാധാനത്തിനായുള്ള അക്ഷീണ വക്താവായും പ്രവർത്തിച്ച പരിശുദ്ധ പിതാവ് ആഴമായ വിനയബോധത്തോടെയും നീതിയോടുള്ള പ്രതിബദ്ധതയോടെയും സഭയെ നയിച്ചു."- ഷാർജ ഇന്ത്യൻ അസോസിയേഷൻ പ്രസിഡന്‍റ് നിസ്സാർ തളങ്കര അനുസ്മരിച്ചു. കുടിയേറ്റക്കാർക്കുള്ള അദ്ദേഹത്തിന്‍റെ അചഞ്ചലമായ പിന്തുണ, നാടുകടത്തൽ നയങ്ങളോടുള്ള അദ്ദേഹത്തിന്‍റെ എതിർപ്പ് എന്നിവ ആഗോള മാനുഷിക വിഷയങ്ങളിൽ അദ്ദേഹത്തിന്‍റെ ധാർമ്മിക നേതൃത്വത്തെ അടിവരയിടുന്നുവെന്ന് അദ്ദേഹം പറഞ്ഞു.