ലിജോ ജോസ് പെല്ലിശ്ശേരിയും മോഹൻലാലും ആദ്യമായി ഒരുമിക്കുന്ന മലൈക്കോട്ടൈ വാലിബന്‍റെ ഫസ്റ്റ് ലുക്ക് എത്തി. വലിയ വടമേന്തി നിൽക്കുന്ന മോഹൻലാലിന്‍റെ ചിത്രമാണു പോസ്റ്ററിലുള്ളത്. പ്രഖ്യാപനം മുതൽ പ്രേക്ഷകർ ആകാംക്ഷയോടെ കാത്തിരിക്കുന്ന ചിത്രമാണു മലൈക്കോട്ടൈ വാലിബൻ. ചിത്രത്തിന്‍റെ കാര്യമായ വിവരങ്ങളൊന്നും ഇതുവരെ പുറത്തുവിട്ടിരുന്നില്ല.

രാജസ്ഥാനിലായിരുന്നു സിനിമയുടെ ചിത്രീകരണം തുടർന്നിരുന്നത്. രാജസ്ഥാനിലെ ഷെഡ്യൂൾ പൂർത്തിയായെന്ന വാർത്ത കഴിഞ്ഞദിവസം പുറത്തുവന്നിരുന്നു. ചിത്രത്തിൽ ഗുസ്തികാരന്‍റെ വേഷത്തിലാണു മോഹൻലാൽ എത്തുന്നതെന്ന റിപ്പോർട്ടുകളുണ്ടായിരുന്നു.

ഷിബു ബേബി ജോണിന്‍റെ ജോൺ ആൻഡ് മേരി ക്രിയേറ്റീവ്, മാക്സ്ലാബ്, സെഞ്ച്വറി എന്നീ ബാനറുകളിലാണു നിർമാണം. ഛായാഗ്രഹണം മധു നീലകണ്ഠൻ. സംഗീതസംവിധാനം പ്രശാന്ത് പിള്ള. മറാഠി നടി സൊണാലി കുൽക്കർണി, മണികണ്ഠൻ ആചാരി, ഹരീഷ് പേരടി തുടങ്ങിയവരും ചിത്രത്തിൽ അഭിനയിക്കുന്നുണ്ട്.