ലേലത്തില്‍ അഞ്ചു കോടി രൂപയ്ക്കടുത്തു നേടി ഡയാന രാജകുമാരിയുടെ വസ്ത്രം. പ്രതീക്ഷിച്ചതിനേക്കാള്‍ അഞ്ച് മടങ്ങ് തുകയാണ് ഈ പര്‍പ്പിള്‍ വെല്‍വെറ്റ് ഗൗണിനു ലഭിച്ചത്. ഡയാനയുടെ വസ്ത്രത്തിനു ലഭിക്കുന്ന ഏറ്റവും കൂടിയ ലേലത്തുകയാണിത്. ന്യൂയോര്‍ക്കിലെ സോത്തെബൈയാണു ലേലം സംഘടിപ്പിച്ചത്.
വെയ്ല്‍സ് രാജകുമാരിയായിരുന്ന ഡയാന 1991-ലെ ഔദ്യോഗിക ചിത്രത്തില്‍ ധരിച്ചിരുന്നത് ഈ ഗൗണാണ്. വിക്ടര്‍ എഡല്‍സ്റ്റീന്‍ ഡിസൈന്‍ ചെയ്ത ഈ വസ്ത്രമണിഞ്ഞ് വാനിറ്റി ഫെയറിന്‍റെ ഫോട്ടൊഷൂട്ടിലും ഡയാന പങ്കെടുത്തിരുന്നു. ഡയാനയുടെ അവസാന ഫോട്ടൊഷൂട്ടിൽ അണിഞ്ഞിരുന്ന ഈ വസ്ത്രം ദി വണ്‍ എന്ന ടൈറ്റിലിലാണ് ലേലത്തിനു വച്ചിരുന്നത്.
നേരത്തെയും ഡയാനയുടെ വസ്ത്രങ്ങള്‍ക്കു ലേലത്തില്‍ വന്‍തുക ലഭിച്ചിട്ടുണ്ട്. സ്വന്തം വസ്ത്രങ്ങള്‍ ലേലം ചെയ്തു ലഭിച്ച തുക ക്യാന്‍സര്‍, എയ്ഡ്‌സ് രോഗികളുടെ ചികിത്സയ്ക്കായി ഡയാന വിനിയോഗിച്ചിട്ടുമുണ്ട്.