ഷാർജ: റോഡിൽ അപകടകരമായ രീതിയിൽ ബൈക്കഭ്യാസം നടത്തിയ അറബ് യുവാവിനെ ഷാർജ പോലീസ് അറസ്റ്റ് ചെയ്തു. സ്റ്റണ്ട് വീഡിയോ വൈറലായതിനെ തുടർന്നാണ് ഇക്കാര്യം ഷാർജ പോലീസിന്‍റെ ശ്രദ്ധയിൽ പെട്ടത്. ‌‌‌ ട്രാഫിക് സുരക്ഷാ നിയമങ്ങൾ ലംഘിച്ചതിനും മറ്റ് റോഡ് ഉപയോക്താക്കളുടെ ജീവൻ അപകടത്തിലാക്കിയതിനുമാണ് നടപടി സ്വീകരിച്ചതെന്ന് ഷാർജ പോലീസ് ജനറൽ കമാൻഡിലെ ട്രാഫിക് ആൻഡ് പട്രോൾ വകുപ്പ് അറിയിച്ചു. ഇയാൾക്കെതിരെ നിയമ നടപടികൾ സ്വീകരിച്ചിട്ടുണ്ടെന്ന് അധികൃതർ പറഞ്ഞു.

അംഗീകൃത പ്ലേറ്റ് ഇല്ലാതെ റോഡിൽ വാഹനം ഓടിക്കുക, ചുവന്ന ലൈറ്റ് കത്തിക്കുക, ലൈസൻസില്ലാതെ വാഹനത്തിന്‍റെ എഞ്ചിനിലോ ഷാസിയിലോ മാറ്റങ്ങൾ വരുത്തുക എന്നിവയുൾപ്പെടെ നിരവധി നിയമങ്ങൾ മോട്ടോർ സൈക്കിൾ യാത്രികൻ ലംഘിച്ചതായി ഷാർജ പോലീസിലെ ട്രാഫിക് ആൻഡ് പട്രോൾ വകുപ്പ് ഡയറക്ടർ കേണൽ മുഹമ്മദ് അലൈ അൽ നഖ്ബി പറഞ്ഞു.

നിയമപ്രകാരം, മോട്ടോർ സൈക്കിൾ യാത്രികന് 3,000 ദിർഹം വരെ പിഴയും 23 ട്രാഫിക് പോയിന്‍റുകളും 90 ദിവസത്തേക്ക് വാഹനം കണ്ടുകെട്ടലും ശിക്ഷ ലഭിക്കും. പിടിച്ചെടുത്ത വാഹനം വിട്ടുകൊടുക്കുന്നതിനുള്ള പിഴ 20,000 ദിർഹം വരെയാണ്. ഈ വർഷം ആദ്യം, ഷാർജ പോലീസ് റോഡുകളിൽ അപകടകരമായി അഭ്യാസ പ്രകടനം നടത്തിയതിന് 19 വാഹനങ്ങൾ പിടിച്ചെടുത്തു.