പാലക്കാട്: ഷൊര്‍ണൂര്‍ - പാലക്കാട് റെയില്‍വേ ട്രാക്കില്‍ ഇരുമ്പു ക്ലിപ്പുകള്‍ കണ്ടെത്തിയ സംഭവം അട്ടിമറി ശ്രമമായിരുന്നു എന്നു സംശയം. പാളത്തെയും കോൺക്രീറ്റ് സ്ലീപ്പറിനെയും ബന്ധിപ്പിക്കുന്ന 5 ഇആർ ക്ലിപ്പുകളായിരുന്നു ട്രാക്കിനു മുകളിൽ ഉണ്ടായിരുന്നത്. ഒറ്റപ്പാലം, ലക്കിടി റെയിൽവേ സ്റ്റേഷനുകൾക്കു മധ്യേ മായന്നൂർ മേൽപ്പാലത്തിനു സമീപം, പാലക്കാട് ഭാഗത്തേക്കു ട്രെയിനുകൾ കടന്നുപോകുന്ന ട്രാക്കിലായിരുന്നു ക്ലിപ്പുകൾ. സംഭവത്തിൽ ഒറ്റപ്പാലം പൊലീസ് കേസ് രജസ്റ്റർ ചെയ്ത് അന്വേഷണം ആരംഭിച്ചു.

കഴിഞ്ഞ ദിവസം വൈകിട്ട് 6 മണിയോടെയായിരുന്നു സംഭവം റിപ്പോർട്ട് ചെയ്യപ്പെട്ടത്. എറണാകുളം - പാലക്കാട് മെമുവിന്‍റെ ലോക്കോ പൈലറ്റാണ് പാളത്തില്‍ അസ്വാഭാവികത അനുഭവപ്പെട്ടതായി ആദ്യം റിപ്പോര്‍ട്ട് ചെയ്യുന്നത്. പിന്നാലെയെത്തിയ നിലമ്പൂര്‍ പാലക്കാട് പാസഞ്ചര്‍ വേഗം കുറച്ച് കടത്തിവിട്ടു. തുടർന്ന് നടത്തിയ പരിശോധനയിലാണ് 5 ക്ലിപ്പുകള്‍ പാളത്തിനു മുകളിലായി വിവിധ ഇടങ്ങളിൽ കണ്ടെത്തുന്നത്. കട്ടിയുള്ള ഇരുമ്പായതിനാൽ വലിയ അപകടസാധ്യതയാണ് ഉണ്ടായിരുന്നതെന്ന് വിവരം.