ഗാന്ധിനഗർ: ഗുജറാത്തിലെ വഡോദരയിൽ ബുധനാഴ്ച പാലം തകർന്നുണ്ടായ അപകടത്തിൽ മരണം 14 ആയി. 6 പേരെ ഇനിയും കണ്ടെത്താനായിട്ടില്ല. പ്രദേശത്ത് തെരച്ചിൽ തുടരുകയാണ്. ബുധനാഴ്ച രാവിലെ വഡോദരയിലെ പദ്ര മുജ്പൂരിനടുത്തുള്ള പാലമാണ് തകർന്നത്.

പാലത്തിലൂടെ യാത്രചെയ്യുകയായിരുന്ന 2 ട്രക്കുകളും ഒരു പിക്കപ്പ് വാനും ഒരു കാറും‌ മഹിസാഗർ നദിയിൽ വീഴുകയായിരുന്നു. ഉഗ്ര ശബ്ദം കേട്ടതിനു പിന്നാലെയാണ് പാലം തകർന്നതെന്ന് ദൃക്സാക്ഷികൾ പറയുന്നു. അഗ്നിരക്ഷാ സേനയും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്.

40 വർഷത്തിലേറെ പഴക്കമുള്ള പാലമാണ് തകർന്നത്. അപകട കാരണം കണ്ടെത്താൻ ഗുജറാത്ത് മുഖ്യമന്ത്രി നാലംഗ സംഘത്തെ നിയമിച്ചു. പ്രദേശത്തേക്കുള്ള പ്രവേശനം തടഞ്ഞിട്ടുണ്ട്.