ദുബായ്: ഐ സി സി വനിത ട്വന്‍റി-20 ലോകകപ്പ് ക്രിക്കറ്റിൽ ഇന്‍റർനാഷണൽ ക്രിക്കറ്റ് കൗണ്സിലിന്‍റെ ഔദ്യോഗിക സ്‌കോററായി യു എ ഇ യിലെ പ്രവാസി മലയാളി മാവേലിക്കര സ്വദേശി ഷിനോയ് സോമൻ നിയമിതനായി. പാക്കിസ്ഥാൻ, ന്യൂസിലൻഡ് , ശ്രീലങ്ക എന്നീ ടീമുകൾക്കെതിരെയുള്ള ഇന്ത്യയുടെ മത്സരങ്ങളിലാണ് ഷിനോയ് സ്കോറിങ്ങ് ചുമതല നിർവഹിക്കുന്നത്. 2009ൽ ദുബായ് ക്രിക്കറ്റ് സ്റ്റേഡിയത്തിൽ നടന്ന പാക്കിസ്ഥാൻ-ഓസ്‌ട്രേലിയ ഏകദിന മത്സരത്തിലാണ് ഷിനോയ് സ്‌കോററായി അരങ്ങേറ്റം കുറിച്ചത്.
ഏഷ്യ കപ്പ് , ഐപിഎൽ, പിഎസ്എൽ , 20-ട്വൻറി ലോകകപ്പ്, പാക്കിസ്ഥാൻ, ഓസ്‌ട്രേലിയ , ശ്രീലങ്ക, യുഎഇ , അഫ്ഗാനിസ്ഥാൻ എന്നീ രാജ്യങ്ങളുടെ അന്താരാഷ്ട്ര മത്സരങ്ങൾ എന്നിവയിൽ സ്‌കോററായി പ്രവർത്തിച്ചിട്ടുണ്ട്. ഏഷ്യാ കപ്പ് ട്വൻറി-20 അണ്ടർ 19 മത്സരത്തിൽ ഡക്ക് വർത്ത് ലൂയിസ് മാനേജരായും പ്രവർത്തിച്ചിട്ടുണ്ട്.
മാവേലിക്കര തഴക്കര മൊട്ടയ്‌ക്കൽ സോമൻറെയും ശ്യാമളയുടെയും മകനായ ഷിനോയ് ദുബായ് ക്യാപിറ്റോൾ ഹോട്ടൽ സെയിൽസ് ഡയറക്ടറാണ്. ഭാര്യ പ്രിയ. റയാൻ, തഷിൻ, ഫിയോന എന്നിവരാണ് മക്കൾ.